Lüch up un fleu herut

Lüch up un fleu herut.
Author:	Richard Büsing
Text type:	Gedicht
Comment:
:

Wenn de Wind weiht över Kluten,
wenn to Is dat Water frust,
drängt de Boßeler na buten,
rögt sick de Klootscheter Lust.
Kribbeln geiht dör Mark un Sehnen,
un de Bost will sik dehnen
to de Losung fell un lut:
Hurrah! Lüch up un fleu herut!

Kickt de Städter dör de Schieben
achtern Aben mollig warm,
mag he geern bi Muddern blieben,
wi swenkt lewer usen Arm.
Bäter is’t, in’t Feld to lopen,
wo von wieden man hört ropen,
rund herum so fell un lut:
Hurrah! Lüch up un fleu herut!

De Butjenter, de Ostfreesen
un ok de van’t Jeverland,
alle stammt se van de Freesen,
sünd Jahrdusend stammverwandt.
All sien Dage, möt ji wäten,
hefft se mit Iskugels smäten;
alltied klung dat fell un lut:
Hurrah! Lüch up un fleu herut!

Gode Dütsche sünd wi worden,
hefft en eenig Vaderland,
un as troe Wacht in’n Noorden
staht wi an de Waterkant.
Brukt dat Vaderland Soldaten
kann et sick up us verlaten;
haut den Feend fix up de Snut:
Hurrah! Lüch up un fleu herut!