L’emigrant ticines
L’emigrant ticines:
– Ciao, nè pa, e ti, mama, ammò un basin!
Ste su franc per ’sti ann che mi son via,
Tornerò se Dio voeur, al me destin,
A portav l’abondanza e l’aligria:
Pasarò dal Campsant di pover vecc,
Dova i riposan stracch de tant lavor,
Che diró: arivedess – cont el coeur strecc,
E che un quai di voeuri dormî con lor.
Saludem la Rosin, disig l’a ’m scriva,
Mi lavori, al savii, anca per lee,
A speri ben de rivedéla viva,
Mama, guardegh un po’, femm al piasée. –
Dova ’l va? Forse de l’Art la stéla
La gha lus in la ment: Roma, Milan,
Firenze el ciaman, come un dì el Vela,
O come el Ciser, onor di nost montagn?
O l’è Paris immens, o l’è Lion,
O Londra, dove i Gatt d’ la val del soo
Han podù guadagnaa paricc milion
Col valor di sò brasc e del sò coo?
O j’é i ranch sterminaa di Stad Unii,
Dell’Argentina, i riv del Paranà,
Dove tanti povritt in ben riescii
Col mung i vacch a tornaa sciori a cà?
O l’Australia, l’ al ciama in fond ai min
A cavaa l’or, o in la sabia di fium,
Dova la usaa la sapa anca el Respin,
Che torna a cà la dii: Comandum nun!
Col capell foeu di oecc e cascia’ in dree,
Al Brissag pizz in bocca, e al sguard sicûr,
Col so pass risolut da montagnée,
Gh’è nessun che d’intor ghé faga scûr.
E l’eco del salut de l’emigrant,
Al rispond ancamò, giù, da lontan,
El fium el canta e ’l corr, e lu cantand
Al ghe va drée per guadagnass el pan.
El Ticines el gha dovert el mond;
El va viv e spedii, ma semper ciâr,
Come i so fiumm el lassa vedee ’l fond,
Ma, mej di fiumm al torna indrée dal mâr!