L Dragon de Bulacia
L Dragon de Bulacia.
Te grotes y tanes di crëps su insom
Dajova Bulacia zacan majon
A n tier salvere de dan dut grand,
Che truep salvans l ciaciova debant
Y messova ti crëier y jì ala mort
Dal rie dessenëus sëura dut ntort.
L fova ncherscëul n gran dragon
Ju sot te n crëp tʼ na perjon.
Tlʼ eghes de ruves, te bur talpins
Burdlova si corp de blo’ rampins
Y ierbes y tieres salveresc dlutivel
Suvënz bon pastri y iagri crivel.
Su insom na cresta stajoveI a surëdl
Cun ciafes y sgrinfles fajoveel l pëdl,
Slungiova si col y spiova ntëur,
L criva l plu bon y dut l plu miëur,
Rutova si dënz a sigon de n sigat ,
Y sgric de fam ti piova l mat.
Su aut giauirivel si gola a sudlot
A sgrac y sbrec dlutivel ju blot.
L suflova su sëites revëntes da fuech
Y linëus sʼ mpiova dut si luech.
Petovel si corp ju sot te fonz,
Levova su fum de blo’ vërt y bronz.
Auzovel si corp ndrëssù a ciaval,
Audiven si bai ju sot te val.
L petova su sveies cun urli y briei,
Che tremova lʼ aria ti bosc y tuei.
Rundeniva sëc si scibli sciblons
Al puere bestiam zitrova i renions.
L ciudlova n crëusc dalonc y dalerch,
T ʼn zer zarovel dut dëibl y sterch
La biesces y bec plu gën y aniei,
De duta la sort de pulams y uciei,
Po manses y cëures sambën ciamorc
Dlutivel a toc fajan si recorc.
Spiovel l iagher, inant se tirovel
Y sëites de fuech ados ti spudovel
Da ierm burdlova si corp ntort
A stlefes stlefons per dui la mort.
Giaurivel si musa a sgrac y a srom,
Mustrovel ca dënz te spluma da ciom.
Jan Mëine dl iagher lassù da Licion
Sʼ ova nfidà a mazé l mustron.
N di chʼ l dragon durmiva pesoch
Al tëut si stlop y ie jit a sgroch.
L ova spià su, bel fovel daujin
Giatel n colp da n bur’ rampin.
La jiva a mort, la jiva a mumënc,
Cantà da chi uedli da fuech lucënc,
Ti al dà dl gial y avisa tucà,
N auter bel colp l à spo destrà.
Y ite per gola y sot tlʼ magon
Sʼ à mpifà la bala de plom.
Ntëur se burdovela a sgric y a sgrac
si sgrinfles petan a sgrafli de giac;
Si cresta taienta da dënz y da spic
Petova per banc, barantli y pic.
N fum de tuesse te n nibl dut brum
Cherdova ala mort, ala fin dʼ uniun.
Ju te chi soc iel jit ala fin.
Cun lëns, vaions y grum de tercin.
Scibli y sveies audiven dalonc.
Dai brei per aria rundeniva chi ronc.
Cun smerdli te crëpes, te sasc y te roc
Iel jit indolauter a berdoles n toc.
A nosc bon iagher na marënda an fà,
Da dui iel unì gratunà y stimà.
Grand ie stat si curasc ladin
A fé al dragon per for na fin.
Śën iel inò dlonch a pastura bestiam
Da Ruacia per Triech, chinamei ta Seniam.