L louf n vea de Nadal
L louf n vea de Nadal
Gere Dalsas vegn na dì d'aisciuda da Fontanac co na ciaria de bore a Pera per lasciarle sear. L'era jà s l pont da Pera, te n colp se ferma i ciavai e seben che l ge à dat cater paicenade, no i volea più jir. Seben che l'era le cater domesdì no se vedea scaji nia, parché l'era dut snigolà. Che no l'é valch n orden, l'à capì sobit, l'à fat l segn de la sènta crousc e l'é desmontà e l va dant a veder, che che sarà. Dant i ciavai l'era n burt louf, che zanaa e che volea sbregar le bestie per magnarsele. L'à chetà chele pere bestie, che bagolaa desche le foe de n bedoi e al louf l'à dit:
- "N nome del Segnoredio, vatene e gei n vea de Nadal, che te daré l più bel agnel che é."
L louf a sentir nominar chel inom sènt, l'à cognù sciampar, e amò n bel pez dò se l sentìa braiar e vaar te bosch. Per no sciotrir i sie no l'à contà nia a ciasa, che che ge é ntravegnù e coscìta no saea degun, che che é sozedù n chel dì. Col temp ence el l'à desmentià chel dafar. Ma n vea de Nadal da doman bonora l'é vegnù l louf e l se à metù dant usc de stala a spetar l patron. Ma l'é vegnù jù la masciara per vejolar. La veit chela burta bestia dant usc de stala, e l'à ciapà na paura dal diàol. La sbraia desche n spirità e la sauta su per sćiala e la ge conta dut al patron e la l prea, che vegne enche el ju con ela. Chist ge disc che l va ben soul ju, e l se n va. Coche l se a pissà, l'era l louf, svedelà dant usc de stala, che ge disc, apena l'à vedù:
- "Ades son vegnù per chel agnel, che tu me as mprometù."
Zenza dir na parola, l'é jit Dalsas te chiusel e l'à tout l più bel agnel e l ge l'à trat tel mus. L louf lo ciapa e se n va coran tel bosch.
Egn e egn l'é passà e Dalsas rua na uta a Chiusa per vener legna. Stencià e sfadià l va te n'ostarìa. L'ost vegn apede el e lo domana, coche la ge passa, se i sie i é duc segn e coscì via n bel trat. Dalsas no sae ne che ne cò e lo domana, che che l'é, che l se nteressa tant de el e di sie, e che el no l cognosc.
- "Ma gio ve cognosce benon. Io son chel louf, che ve volea sbregar i ciavai e che ge aede dat n vea de Nadal n agnel. Seben che ere famà debel, l'é ofrì al Segnoredio e son stat librà. N chel dì l'é mort chela cativa persona, che me à fat doventar n louf."