La Candelera

by Amable González Abín

Onde vas tan apurau,
Juaco, que avientas las piedras,
Y paez que ti dieren jueu
Y el diañu mesmu te lleva !
-Vo pa la gran romería,
La nombrada Candelera
Que se celebra mañana
En esi xardí i de Nueva,
Y e de las fiestas meyores
Que hay en muchísimas leguas;
Fiesta que á veces alvierte
Que ya va´l inviernu juera,
Cantando los paxarinos
Y floreciendo las huertas.
Allí va xente de Llanes
Y xente de Rivisella,
Y en basna los de San Xurde
Con Llamigu y Reínsena;
Unos á pata y andando,
Otros en patas ayenas;
Coches que llevan caballos
Y coches que no los llevan,
Y son esos atomóviles
Que diz mió futura suegra,
Que un Diablín tienen per dientro
Pa dayos güelta á las ruedas.
Pero, ven, y cuntareti
Que e llarga la hestoria esta.
Ven, jallaremos castañas,
Güena sidre y güena mesa,
¿Que hebo muy poca mazana?
Si, no argayaren con ella
Los mazanales, tampocu
Pa estruyanos la collecha
Tuvieren que puxar munchu
Los llagares, pero, arrea,
De alguna parte saldrá,
Non pases por ello pena.
Oirás la misa, cantada,
Con música gayaspera,
Los cuetes, bombas y tiros
Y barrenos que atroneyan,
Y verás la prucisión
Tou alredior de l' iglesia.
Dempués de alegre comida
Que el arroz con lleche cierra,
Vien la junción de la tardi,
De curiosos lances llena.
En un llau vienden pumares,
Guiyadas en otru mercan,
Y las naranxas del valle
Golorosas y mariellas,
Que paez que el oru colleren
De los cielos y la tierra.
Al mesmu tiempu que en baille
La mocedá se solmena,
Y algunos formando corru
Muy tiernamente corteyan,
Corre en otros llaos la sidre
Y desátanse las lluengas
Allí me verás á mí
Parllar más que reñovera,
Espetando más mentiras
Que pelos tien mió cabeza.
Al í sabrás los ajustes
Que jacen pa las teyeras,
De palabra, y remoyáos
Por quedar la boca seca,
¿Qué si la cumplen asina?
Tamién el aire la lleva.
Y mócanla más de cuatro,
Sin esclupu ni vergüenza.
¿ Si habrá guantadas y palos ?
Non digo que non los heba,
Pes anque vamos pa 'lante
Y están los guardias alerta,
Hay llampriazos que se pierden
Y llampriazos que se alcuentran.
-Ya no me extraña que corras
Que paez qua el diañu te lleva,
Pes cualquiera que te escuche
Vola pa la Candelera.
Jacistimi entrar en ganas,
Engaitéstime de veras;
Aguarda un pocu, rapaz,
Que vamos xuntos pa Nueva .
A echar una cana al aire
En tan divirtida fiesta.