La Diskurso a Gettysburg

by Abraham Lincoln

Pri

Ca diskurso da Usana Prezidento Abraham LINCOLN esas un del maxim famoza diskursi di Usana historio. Il diskursis al dediko dil Nacional Cemeterio dil Soldati a Gettysburg, Pennsylvania, ye 19 di novembro 1863, dum la Usana Milito Interna, quar-e-duima monati pos la Batalio di Gettysburg.

La Diskurso a Gettysburg

Okadek-e-sep yari ante nun, nia patri fondis sur ica kontinento naciono nova, konceptita de libereso, e dedikita a la propoziciono ke omna homi kreesas egala. Nun ni okupesas da granda milito interna, probante ka ca naciono, od irga naciono tale konceptita e tale dedikita, povas durar longatempe. Ni kunvenas sur granda batali-agro di ta milito. Ni venas por dedikar parto di ta agro kom repozeyo por ti qui donis sua vivi por ke ta naciono vivez. Tote konvenas e decas ke ni facez to. Ma, plugrandsence, ni ne povas dedikar, ni ne povas konsakrar, ni ne povas santigar ica sulo. La brava viri, vivanta e mortinta, qui interluktis hike, konsakris ol tre plu multe kam nia povra povo augmentar o diminutar. La mondo poke remarkos e ne longatempe memoros to quon ni dicas hike, ma ol nultempe povas obliviar to quon li facis hike. Ni, le vivanta, esas dedikenda hike a la entraprezo nekompleta quan li qui bataliis hike tante noble avancigis til nun. Ni vicee esas dedikenda a la granda tasko restanta ante ni, ke de ta mortinti honorizita ni prenez devoteso augmentita a ta entraprezo por qua li donis sua finala quanto de devoteso; ke ni forte rezolvez hike ke ta mortinti ne mortabez vane; ke ca naciono, sub Deo, experiencez nova nasko di libereso; e ke guverno di la populo, da la populo, por la populo, ne perisez de la tero.

Ligili

La Diskurso a Gettysburg - che situo dil tradukanto, inkluzas original texto en l'Angla.