La Vijion tel sonn
“Questo testo è tratto dal Corpus dl ladin leterar creato dal Prof. Paul Videsott della Libera Università di Bolzano” .
La Vijion tel sonn.
Ci vëighi mai? Mʼ ingiani o no?
Ci ó dí les löms a cënt impiades,
Chësc lominus chiló y iló?
Él stëres jö dal cil tomades?
Y dlunch chël drap döt fosch destenü,
Sö sot, por chi parëis, dijede,
Ci ó pa chësc dí? Él sozedü
N miraco o ci él pa scenó? Cuntede!
Os, jones santes ʼcër chël let,
Cun löms tla man, injenedlades,
Porcí chësc guant döt blanch de nöt
Y les gherlandes indorades?
Dijedʼ, cuntedʼ bel snel mitans!
Compagnes fôs pö mies, saurides
Y prosses, di agn bi y zënza ingians;
Ci stëise iló tan bel vistides?
Ah mi bun Dî, ci vëighi mai
Tʼ amez chi ciüfs, de flus curida?
Porcí chiló mez mort mʼ un stái
Insciöche colpí da ria ferida?
Él vëi, mʼ ingiani? Mëssi crëie
O pói ciamó mʼ avëi speranza?
De no ciügnëise, o jones! Savëi
Sái sëgn mi mai de chësta stanza.
Oh santa, lʼ ultim baje te dái
Sön chëres mans por me mai stances,
Sön chi bugn edli che düc i mai
Tignî lunc da me; sëgn mancesʼ,
To corp é destenü söl let
Dla mort, mo dötes tües parores
Y amoniziuns a mi intelet
Mi cör arbandoné ne póres.
Por chësc baje sant sön tü slef sanc
En chësc momënt solen impormëti
De fá lʼ orëi de Dî y di sanc,
Sot tüa custodia a chësc me mëti.
Mi joramënt sinzier te plej,
I le vëighi da to ciugné, ëra santa;
Contënta al cil sciöche i bugn fej
Tʼ un vasʼ, olache „Te Deum” düc cianta.