La chiena de Gherdëina
La chiena de Gherdëina.
Ciantia metuda adum da Leo Runggaldier
Via Maciaconi
Ulache la fej giauloni,
Jide sun su aut
Cun la musa for mpontaut.
Cialëde sun ch'i pic,
Cialëde po ce vic.
Śën gëura po su l usc,
Ruvon ite te n busc;
Po iel pa dut bel chiet,
Sc'che n fossa bel a liet.
Nia ne se muev,
Sta ca sc'che da nuef.
Mpo iel dut vivanda
Sibe lën o sibe banda
D'aier o d'albric
Ados te vëniel sgric.
Gëures su la musa,
Te sautel su na giandluja.
Jënt iló strandleda
Sun parëi mbrucëda
La lënga dedora ju
I snauzeri mponta su.
Dal frëit a di d'anda Talina
Giatun mo pel de gialina.
Na nibla iló de sboc
De ntieres y de roc,
Bec iló castrec
Fac de lën de pëc.
Sce n sofla it' te n cucuch
Audun cuch cuch cuch.
Bulëures y cëures
Che fej d'uni lëures
Giac y musciac
Che fej d'uni ac.
Gialines y talpines
Se sauta it' tla tlines.
Auces y aucons
Corves y ciauscions,
Punjins y curnacins
Cun codes
da buchins
Purciei y vadiei
Cun biesces y aniei.
Brunsins y brunsineles
Ciampanes i ciampaneles
Lingioles y giajoles
Vesoles te tercioles.
Gimpli y pimperli
Semea plu tei mincherli.
N pastrëc iló de bëc
No os, no pel, y sëc;
Croc iló biei blòc
Semea plu bagoc,
Cun cëira y fulminanc
Sauti su sc'che manc.
Sce n ti dà po' na drucheda,
Doite na sufleda
Po' audun n bel scibl
Che śëna propi tribel.
Sce n tira po' te n spech
Po' audun tech, tech, tech.
Na vacia che cinia
It' per na crinia,
Un che la mëuj
Y stridla ju cul bëusc
La condla ie per finta
N catl dala tinta.
N ciaval iló y n'afa
Da n fust furà te tafa
La giames sc'che n saioch
La vita sc'che n maioch,
Sbriscia su per n zetel
Y culeta po' sc'che 1 petl.
Te stalot n gran purcel
Che roncia ju te n pel
Sot tl sterdum
Snortla tl chetum.
Te ciapin y te ciapotl
Cun na pinta y n batotl.
Malans che spuda fuech
Na lenga sc'che n perstuech
Dlongia mo tei mandli
Paiazi dut n zandli.
I sona duc tamburdli
I tira de drë gran urdli
La lesures ie de pel
De manz o de vadel,
Se scana dut se storj
Se spana dut se ntorj.
L vënter plën de paia
Sut piet na gran bedaia.
Zopes de popes,
Giames da gropes,
Masseles sc'che puni
Cuecenes sc'che runi
Badli sc'che padli
Piesc sc'ce redabli.
Doi tlo maridei
Se tol per i ciavëi,
Cun na pela dal pan
Se dai po stlefan.
Cun tibli, tapli y tumbli
Se fieri mo do cun fumbli.
Sce n ti dà po' na sbingheda
A na codla ch' ie tacheda,
Cinia n musciat
Cun coda y cumat,
Tira mo de pe
I maia po' leché.
Dut jola, sauta y śëna,
Rena bredla y stema,
Zera, sgrafla y ficia
Fora rafa y picia.
Bala, bula, baia,
Bloca, rota y maia.
Sce ulëis udëi la chiena
Na zopa o na biena
Na cëria o n ceston
Na zuma o n vagon
Jide ja Zenz de Levisc
Giatëis dut chël che i dij.