La cioura mula
L Kalënder ladin per l ann 1915
Liber per la fameia ladina
5° ann
Dat òra dal "Union dei Ladins" a Dinspruk
Metù adum da Ufherpantone Complot da Fufherok
Stamparia del Kinderfreund
Filiale St. Ulrich (Grodën)
La cioura mula
L é rué la cioura mula via Liviné,
sun fegolé l'é juda e m'à stravé l café.
L’è touta e vian stala l'è menada,
ma zenza che me ntáne l'é sciampada
delongo sun tablé a me renté
su dut el fen e dut el mescedé.
Me pense, voipa la mené via Roncat,
che forsci la me dapa n bon pazon de lat;
ma trei o cater dis davò
mi è mossù jì a la tò,
che la ié sciampáva su la fava dei Roncac
e la mangiáva duc i còsoi coi balac.
Passé Sotil son rué ja Molinat:
"Sta ria cioura vé no dapa lat,
te pòs ben prëst ié fè la fin."
La disc la Angela da Molin.
Mi passe per Retic
I disc che l’é n mestic
Con gran fadia rué su sun Còl
e per fortuna la me fèsc azòl.
Me pense, voipa i la mené su al benefiziat,
che l apa n clap de giac, ma ciarestìa ben de lat.
Co son rué sun plaza,
l'à fat na gran baraca.
Me tòle chësta cioura e tourne via Brenta,
ma ja Finazzer la ié strava la polenta.
Ju da le Brue
La fèsc le sue.
Via n Cënadac son ruè dut spaventé.
Ilò nte un da Laste m'è nconté:
"Ciò, ciò, sta cioura l'é de la fia de Jan del Jo,"
l me disc e i é respone dërt content daspò:
"Mi vade a cherì sti Jan
che sonpa stuf de paié dann."
"Chilò Tereja t'as tua cioura, èi!"
"Pò, bèrba, cioure mi no n é bù mèi."
"Scì, scì, Tereja, ilò davò majon
mi t'epa ben vedù a te fè l pazon."
"La cioura no la voipa tò,
no sè vè ulà la mëte spò."
De bòta sauta fòra de cèsa l Sfersé.
"Pò tòla che te depa stala con tablé
e a la vejòlé te basta jì sun Pre longié,
te vedaras ilò l é n clap de ciòf da pelé."
C.L.