La flu de nosta vita
La flu de nosta vita.
Ah, nosta jona vita
En bela y frësca flu
S' un passes en belaita
En cil al gran santú.
Sëgn sö, sorus, ressolta
La nosta vërda eté
Aspires a gran racolta
Por le de dl' eternité.
Por döt gran diligënza,
Slöm zënza fraidité!
Bandida vigni odiënza
Y rovun a santité.
Nët, döt nët zënza macia
Sides tres nosc fornimënt;
Plü nët y zënza tacia
Sides le cör bel liciorënt.
Ah, jones, frësches cherles,
Al cör nost le plü bel or,
Al col les blances perles
Nes sides operes de vero onur.
Modestes y de bona vita
Nes bates por dötes n cör;
Guai, fora de chësta lita
A l' onesté sce öna mör.
Onur, virtú, inozënza,
Na vita jona en flu,
Laur cun diligënza
Fornësc la gioventú.
Nosc vire söla tera
Spo é n ligher bel cianté,
Che döra, vënt la vera,
En cil a nes incanté.