La funtana da Puntives
La funtana da Puntives.
Dan plu cënt ani fovel ora per chi mujenëies da Puntives de biei bòsc i pastures. N dij nce che da vedlamënter dessel vester stat iló na zità.
N di vardova l paster da San Piere la vaces ite per chësta pastures. Da mesdì se sëntel dlongia na funtana a se maië mpueʼ de pan sëch y se bever mpueʼ de lat.
Ntan che l marënda vën n tel pitl mandl, n zwergl adalerch, se sënta dlongia d’ ël y scumëncia a se lamenté di stlet tëmps, de fam y nsci via. L paster, n bon coscio i dà mez n pan y l lascia bever ora de si condla dal lat. ‒ Canche i à abù finà de marendé y se l’ à mpueʼ ciaculeda, rengrazia chësc pitl zwergl de cuermënter y dan pié via dijel che l dëssa mëter la condla sot a funtana y la lascé na nuet. L di do sarala plëina de sablon. Chësc sablon dëssel jeté te n fol dala farina y la purté l di dlʼ anes da sëira sun plaza dlʼ aucia a Tluses.
L paster fej nsci. L di do fova la condla bel mpont plëina de sablon; ël la jeta te n fol, l ascuend y da d’ auton l di delʼ anes domesdì val limpea a Tluses. Sun plaza dlʼ aucia ancontel danterëures n gran seniëur y chësc l damanda cie che l porta pa tlo te chësc fol.
L paster gëura, lascia udëi y dala sperduda essel ades lascià tumé l fol ‒ l sablon fova deventà blot plover dʼ or.
L seniëur i sporj al paster na bëursa cun cënt zechins d’ or laite y se n sparësc cul fol.
A jì a cësa se mpënsa l paster chësc vuei pa fé plu suvënz.
Bel l di do val cun si condla ta Puntives; ma giut y lonc y lerch al crì, zënza vester bon de giaté su la funtana ulache l ova d’ instà metù sot la condla.
Da ntlëuta incà ne n’ an mei plu nrescì velch d’ chësta funtana dal or.