La munt de Fojedöra
La munt de Fojedöra.
Plü y plü tif sot me les valades y viles sʼ arbassa.
Plü y plü alalt söla munt, prësc söla colma iu röi.
Na aria plëna dʼ odur y frësca mo vën adancuntra
jö dla dlacia dai crëps, na aria preziosa dal ci.
Sën te na ota dan mi edli paschi se sleria
Plëns de erbes y flus, desco te n bel paraisc.
Dër lesier i pîsc sën ciapa sön beles tovaies
bel ciosciüdes con flus, erba y müstl morjel.
Bela enfornida con or y arjont, iestida de purpur,
sora i crëps al ci sʼ alza la rëna alalt.
Desco peres prezioses y or la rosada lomina,
lunc y lerch söla munt vëigon les flus lominenn.
Jö te na fopa vërda da erba les üces an vëiga
arcunciades adöm, dlungia le rü dal ciampëi.
Danter le slinghinamont dles ciampaneles dla ciassa
aldon slafenn y scraienn, plëns de ligrëza, famëis.
Döt ci co é vi y é bun de sʼ armere, salta y ciga.
Lʼ ürle dai prodadus sö te chi crëps rondenësc.
Vigne prodadú se chir so laur con la bona.
Önn arjigna ciajó, lʼ ater desbrama le lat,
n ater cora le lat y arcuncia ciadins sön corones.
Ince önn te ciolá turna la pëgna dassënn.
Fora de pëgna le smalz te na copa de banda corëta,
bel con la ciaza da cerne vëgnel adöm abiné.
Ésera fata spo la tornedöra torona
röera atira a post dlungia les atres a sté.
Sora le fü ciüscedëia te smalz la jüfa de brama;
cöta sön öna na pert, ota sölʼ atra ara vën.
Jont sconada dal mal, nasciüda por fis dla fortüna,
os abitanc de munt ëis söla tera le ci!
Aria frësca de munt con mile odurs se renforza,
ega sana dʼ arjont fora dai crëps rogor.
Lat bunfrësch grassin se mantën la vita gaierta,
y dal ozio dalunc ince se tën le laur.
Contentëza y amur ales munts se fej la fortüna.
Osc paisc é la munt, osta ligrëza i crëps.
Sën i prodadus tralasciunʼ y dijunʼ aroeder!
Jun plü ennant söla munt, fora por paschi da flus.
Fora dai bi plomac da or y arjont y de purpur
sora les cordes dai crëps sʼ alza sorëdl plan plan.
Früc de munts al ci ciüscedëia na ciancia morjela,
tlʼ aria i gran variös roda y sciüra alalt.
Ala finada sën röi olache i paschi se röa.
Sot me vëighi parëis ërc, dër alc daspaont.
Jö tla valada vëighi te n iade urc y campagnes,
ciases amez de bi pres, viles con gran ciampanins.
Danter le vërt dai pres lomina les blaes madüdes
desco cordeles dʼ or danter tovaies de lü.
Desco na vëta dʼ arjont se tira tres la valada,
tres campagnes y bosc lʼ ega co röa tal mer.