La pegora e 'l loff
Gioann Rizzonich (1789-1875)
La pegora e 'l loff
On berin, pover bestioeu,
de cinq mes appenna e on dì,
el beveva in d'on ronsgioeu,
quand el ved a rivà lì
tutt a on tratt, on Lóff che anc lù
el se mett a lappà su.
Figurass che tremarella
gh'è vegnuu al pover Berin,
quand el Lóff per fà quarella
el ghe dis: - O biricchin
cossa l'è sta creanza porca
de famm l'acqua tutta sporca?
- Oh, Scior Lóff, cossa el me dis,
lu l'è in alt, mi sont abbass,
sicchè donca m'è duvis
che lu el disa inscì per spass:
- T'ee sparlaa, el ghe torna a dì,
ses mes fa, sossenn de mì.
- Ses mes fa!!... ma se hoo compii
i cinq mes appenna adess.
- Ben: tò pà el m'ha maledii;
tì e tò pader l'è l'istess. -
E senz'olter dagh a ment
el le sbranna in sul moment.
“Se corr semper di pericol
a trattà coi prepotent:
el pess gross el mangia el piccol,
chi periss l'è l'innocent.
Tegnii a ment sta mia parolla:
hin i strasc che va alla folla”.