La soriza e la bariza
ANDREA DA CORTÀ
La soriza e la bariza
Era n ota na soriza
che ciantea su na bariza.
Dute cuante a bocia verta
destirade su na cuerta
i starea dure a scoltà
chesta guos da tuoi al fià.
Ma no l era nia da fèi,
solo rime sul formèi
frico, vecio, opur coi bus
na delizia pal sò nas
carche viado, no da spes
dughe o iat da tuoi pal nas
ma l pensier de chel disnà
l ecuilibrio i fa mancià
sul pi bel de sta ciantada,
co la nota gorgolada
la soriza la fa n ‘solo
che la peta do sul siolo
la bariza revesada
rodolea do par la strada
come n colpo de canon
la se sfasa su n peron.
La soriza a dile dute
la destira le zatute
pal gran colpo e pal teror
s’a fermà l sò puoro cuor.
La sò guos da in chela dì
no se l a sientesta pi.
Par la dente de la vila
l é stà propio na gran bila.
Con turibolo e feral
i t’i a fato l funeral
torz che fuma, ega santa,
e la dente dos che cianta
dute cuante in portesion
propio come la pasion.
I l a scorta via in Noere
con parsora cuatro pere
de cianepa doi garniei
e na lun de bon formèi
tre ramute de bodis
e na scrita che la dis
“Pausa ca chela soriza
che ciantea su la bariza”.
(Pozale)