La stazions o La via dla S. Crëusc
LA STAZIONS O LA VIA DLA S. CRËUSC che cuntën de bela cunscidrazions y urazions. Metudes dal Talian tl Parlé de Gherdëina. BULSAN, stampà pra Carl Giusep Weiss.
- ATO DE CONTRIZION
O mi bon Die! Ie me n posse mel de vere cuer de duc mi picëi, davia che ie v' é ufendù vo, o mi bon Die, che sëis l mi bon pere, l mi bon seniëur, l majer bën de duc i bëns, che sëis dëni de vester amà sëura duta la cosses. Per chësc ie deteste abomine, y maledësce duc mi picëi, ve damande umilmënter perdonn, y me tole fermamënter dant, cola vosta santa grazia de me schivé da duc i picëi, mascimamënter dai mortei, y da duta la ucajions, che me po tré al picià, y adrove duc canc i mitli per me schivé, così sia.
Maria! da Gejù mi bën fajëde, Che cun frut cuntemplëie la pëines śën.
- I. STAZION.
Gejù vën cundanà ala mort. Cunscidrazion. Pilato ala mort cundana a tort, Gejù! sentënza aricëula, che ne se po dì de plu. Urazion. V' adore pra chësta prima Stazion, redentor dut d' amor! cundanà da Pilato ala mort, y trafì da n vere dulëur, ve ie prëie drë bel da me perduné duc mi picëi, che ie sënza numer. Amen. Paternoster. Cruzefis Gejù! Pietà, ie son chël che dut fala!
- II. STAZION.
Gejù tol la Crëusc sula sciables. Cunscidrazion. Vé tlo ti Redentor cun l pëis dla Crëusc ciarià! O tan de plu che chësc i pëisa ti picià. Urazion. V' adore pra chësta segonda Stazion. Gejù adulerà! Ciarià per amor de me cul pëis dla Crëusc, y l istës tëmp ve prëii dla bela grazia de purté cun frut l jëuf dëuc de vosc santiscimi cumandamënc. Amen. Paternoster. Gejù Crist cruzefis avëde pietà de me.
- III. STAZION
Gejù toma l prim iede sot la Crëusc Cunscidrazion. Tlo toma l bon Gejù per l prim iede a tiera. Y nëus i fajon for cun nosc tumé la viera. Urazion. V' adore pra chësta terza Stazion, mi redentor! che tumëis da nescia, l prim iede a tiera, y cun dut l cuer suplichëie dla grazia, de ne tumé mei plu dut l tëmp de mi vita n picià murtel. Amen. Paternoster. Gejù Crist cruzefis avëde de me pietà.
- IV. STAZION
Gejù anconta si oma adulereda. Cunscidrazion. Maria anconta tlo cun gran dulëur si Fi. M' anconte chësc si Fi, cun gran pietà n di. Urazion. V' adore pra chësta cuarta Stazion, mi bën amà pra vosta oma adulereda, che vo ancuntëis sula streda tl Calvare, ie ve prëie cun umiltà de ve prejenté a mi da bon Pere sul pont teribl de mi mort. Amen. Paternoster. Gejù Crist cruzefis, avëde de me pietà.
- V. STAZION
Gejù vën judà da Scimon Zirené a purté la Crëusc Cunscidrazion. Scimon de Zirene mi chël pëis dajëme; Da giut l' ei merità, me druche pu, ne trëme. Urazion. V' adore pra chësta cuinta Stazion, salvator amabl, judà dal Zirené a purté la Crëusc, ie ve prëie cun fidanza d' armé mi cuer dëibl cun na gran pazienza a supurté i travaies de chësta vita, per sudesfazion de mi picëi. Amen. Paternoster. Gejù Crist cruzefis, avëde pietà de me.
- VI. STAZION
Veronica suia a Gejù l mus. Cunscidrazion. Da man pietosa l mus a Gejù vën suià. Mudëme l cuer, al mel ruel ntlinà. Urazion. V' adore pra chësta sesta Stazion, redentor plën d' amor suià ju dala bona Veronica. Y tlo dant a vosc piesc svergunià ve prëii plu che posse, dla bela grazia che mi cuer vënie demé da vosc amor mpià, che sëis la belëza dl Paravis. Amen. Paternoster. Gejù Crist cruzefis, avëde pietà de me.
- VII. STAZION
Gejù toma sui doi iedesc a tiera. Cunscidrazion. Tlo toma inò Gejù, y leva su stentan. Y nëus tumon ruel, y jon tuman rijan Urazion. V' adore pra chësta setima Stazion, mi seniëur adulerà, che tumëis sui doi iedesc a tiera, ie ve prëie sustan dla grazia de ne tumé mei tla mëndra ufeja de vo. Amen. Paternoster. Gejù Crist cruzefis, avëde pietà de me.
- VIII. STAZION
Gejù cunsola la dones che bredla. Cunscidrazion. La dones bredla tlo per amor dl bon Gejù ! Spitrons a bradlé, canche l ne jova plu? Urazion. V' adore pra chësta otava Stazion o caro Gejù, che cunsulëis la bona dones che bredla, ie ve prëie cun gran devozion de dé a chisc mi uedli ruves d' antia gotes, per bradlé l gran numer de mi picëi, che ie la sëul' gauja de vosc patimënc. Paternoster. Gejù Crist cruzefis avëde pietà de me.
- IX. STAZION
Gejù toma sui trëi iedesc a tiera. Cunscidrazion. Tlo toma l bon Gejù l terzo iede a tiera. Y tu ne zedes no de fé mo for la viera. Urazion. V' adore pra chësta nona Stazion, Gejù adulerà, blandà cun sanch trëi iedesc tumà a tiera, ie ve prëie cula gotes ti uedli, y cul dulëur tl cuer, che pliëise n iede mi ustinazion tl mel y me dajëise la grazia de ne tumé tl infiern che é merità tan de iedesc cun mi picëi. Amen. Paternoster. Gejù Crist cruzefis, avëde pietà de me.
- X. STAZION
Gejù vën desfurnì, y dat da bever fiel y ajëi. Cunscidrazion. A Gejù vën dat n' antia buanda: Bon tëmp l cristian, y blëita damanda. Urazion. V' adore pra chësta decima Stazion, o redentor dl mond, desfurnì che messëis bever fiel y ajëi, ie ve suplichëie de vere cuer de me cunzeder l destacamënt dai plajëies da nia dla tiera, per me fé dëni dla alegrëzes dl ciel. Paternoster. O Gejù cruzefis, dunëme l Paravis.
- XI. STAZION
Gejù vën ntlaudà sula Crëusc Cunscidrazion. Vé tlo, l Re dl mond vën sula Crëusc tacà. Pentëscete śën, la gauja ie ti picià. Urazion. V' adore pra chësta undejima Stazion, mi oml Gejù, metù y ntlaudà sul lën dur dla Crëusc, ie ve prëie umilmënter de cruzefigé cun na pert de vosta pëines mi cërn rebela, y si ueies ries. Paternoster. Gejù Crist cruzefis, avëde pietà de me.
- XII. STAZION
Gejù mor sula Crëusc. Cunscidrazion. Tlo cëla, mort l bon Gejù per te a tort. Y dëss ngrat cun ti picëi fat da nuef la mort. Urazion. V' adore te chësta dodejima Stazion o Salvator dl mond, tl' aria sula Crëusc tamez a doi melfatores, che sëis per spiré l' ana santiscima al Pere, per sudesfazion de mi picëi che ie sëul' gauja de vosta mort, y per chësc ve prëii ie dut umilià y pentì d' auzé mi cuer dala meseries dla tiera ala cuntemplazion dla cosses dl ciel. Paternoster. O Gejù redentor, dunëme vosc amor.
- XIII. STAZION
Gejù vën tëut ju dla Crëusc. Cunscidrazion. Tlo paussa mort tl grëm de si oma l redentor, Oh! paussa contra de mi rabia, y mi furor. Urazion. V' adore te chësta decima terza Stazion, o Seniëur tëut ju dla Crëusc ti braces de vost' oma adulereda; ie ve prëie cun duta mi ana de me dé la grazia d' avëi ruel l cuer nët, y jià dla virtù santes, per ve recever deniamënter tla santa cumenion. Paternoster. Pietà, mi bon Gejù, che n' ue v' ufënder plu.
- XIV. STAZION
Gejù vën metù te fossa. Cunscidrazion. L corp dl Salvator te fossa vën metù. Bradlon almanco śën la mort de nosc Gejù. Urazion. V' adore te chësta ultima Stazion, Gejù plën de misericordia! mort te fossa, y cun la grazia de cunscidré suvënz cun frut vosta mort y pascion dulerëusa, ve prëie mo leprò dl gran don de sté scialdi te vosc sant amor y timor nfin ala mort, per recever la curona dla gloria n ciel. Amen. Paternoster. Gejù Crist cruzefis, dunëme l Paravis.