Lasam valikodik in München

Iparraguirre

Do no labobs nog nunis lefulnik tefü Lasam volapükelas, kanobs e mütobs nunön liladeles obsik sludis veütikün.

Pestaboms Volapükaklub valemik e Kadem volapüka.

Pos damanifam lasama fa söl plofed dokel Kirchhoff, äzitom välam cifefa kluba valemik. Söls suköl päväloms: As cifal: söl Schleyer J. M. datuval volapüka; as dilekel: söl gab Tauffkirchen-Lichtenau; as sekretels, söls: Schnepper (cifel), Herold (pükavel), Kniele (vunasanel).

Volapükabled söla Schleyer olabom nemi Volapükabled zenodik e obinom füdo nogan volapükelas valik vola.

Cifal kadema binom söl Schleyer J. M. As cif kadema pävälom vävögiko söl Kerckhoffs August in Paris (Telegam päsedom foviko e söl Kerkchoffs ägepükom me telegam votik de dan, lensumöl stimi at).

Kademals päväloms in ked kulado at: Spän, F. Iparraguirre; Lusän, Rosenberger; Bodugän, Silva Teixeira; Nelij, Dornbusch; Täl, Ferretti; Melop, Sprague; Nedän, Winkler; Flent Kerckhoffs; Löstakin, Obhlidal; Nugän, Banfi; Silop, Bernhaupt; Deut, Herold, Schnepper, Kniele.

Mobs valik tefü votams glamatik u vödasbukik polovegivoms Kademe, bi lasam no elabom timi. Te votams veütikün pelasumons ya. As sam:

• Penön vökädis ä, ö, ü äsliko aipenobs (Mobis^[1] balid obsik).
• Pladalön kosonati ، fa h (Mob telid obsa).
• Penön nemis lönik segun lotogaf läna alik (Mob 4id obsik); ab if penon balidno, penonös in ( ) nemi in lotogaf volapükik. In lotogaf at ton j obsa = ch deutik, openom me q nen u, as sam München (Münqen).
• Dejafön bisilabi of, pladalöl fa ji, kel pogebom egelo nen fetanalien.
• Dejafön fetanalienis in vöds finöl fa ös, öd, öv (Mob 27id obsa). Te silabs li e la olaboms fetanalieni.
• Pladön lä velibs ladvelibis, kels olaboms finami nonik in stül balik, finami o in stül klatelik (Mob 14id. obsa).
• Gebön pönopi ol pla ons (Mob 10id obsik).

Yegs, dö kels pepükatos: -1. fa söl datuval it: «Dan pakeles volapüka». -2. Söl Einstein: «Blüfs vönik tefü pük vola». -3. Söl Kirchhoff: «Zeils plo glofam volapüka». -4. Söl Gutensohn: «Statit pakama volapüka.» -5. Söl Herold: «Dö otät plisipas in tonavotam vödas volapüka e pükas nulik». -6. Söl Kolling: «Dö mod gudikün paköna volapüki.»

NOETS. (Vükifonät)

1. Bükapök; pla: mob.

Se Volapük: Gased bevünetik tedelik, nolik, literatik e gälodik 1887, Nüm: 8, Pads: 77-78.