Le Vivane e l cian
Le Vivane e l cian
Sa mont da Vich l'era n vacé te n bait, che fajea rufiei da cena. L'é ruà na tousa e la disc:
"O, dame da magnar ence a me, senó che te sbreghe te."
L paster ge à responet: "Speta na uta, che i rufiei se rutolee, che dapò a far a la part aon ben temp."
Ntant la l'à domanà: "Asto cian, e?"
"Po, aré cians, é demo vace e vedìe."
Comai i rufiei i é stac coc e prest per magnar, l disc:
"Vae a tor ciadins", ma nveze de tor ciadins l'à molà fora l cian.
A veder l cian, la tousa, co le man ti ciavei la é sciampada urlan:
"Jeches, jeches, gio son famada e l'à dit che no l'à cian, e ntant l n'à. Ma varda che no sfamar la jent no porta pro!" e la é sciampada sun n sas aut, che l cian no ge podea ados. Dapò l'à metù le man coi polesc nsema slariade e su dret (n ato de faturec). Nterdana l'é vegnù doi compagne e le se à metù a ciantar:
pagina:184 "Oh bele crepe / baite nosce / Se jent saessa chi noi sion / Che ton, aur, amor te man aon / scacé col cian no fossaron." L vacé se n'à abù recor e l'à chiamà l cian de retorn e a le touse l ge à cridà sù, che le vegne pura, che l ge dasc da cena a dute trei; parché l'ae paura che mal ge ntravegne. Ma le vivane le era sparide e el se à tecià e da mont i l'à menà. L'aea na fam dì e not, l tafiaa per set e mpò l'era alis e sech desche n pich. L'à proà chist e chel, ma nia no ge à joà. Na dì l se à mbatù te na veia, che saea più che le autre e ge à contà dut n pila e n pilot, e l l'à preada, che la ge dae n conseil. E chista la disc:
"Bon bot, bregostana chela no l'era, ma scì na vivana, dea di bosć e de le crepe, che stasc sui monc a far varda, che l bestiam no magne ne baùtoi, ne birene, ne còrdole, ne piante ne bòzole velenouse, e che nia de mal no ge ntravegne. Ma scì, malfat tu as, a de taf no dar e n'aer. Pere tu! Ades tu cogne penar, che no tu ge as dat da manducar. Set da set brutel tu tafiaras e cater sasc (n gran bocal de creida i moches i ge disc Stein) al dì tu slaparas, zenza che l'alis tu fermaras. Demò os e pel te restarà. Ombie e ciavei e barba te cresciarà, che om dal bosch tu somearas. Canche l'é an e dì, va sa mont, fa fum biaf da bòzole de jeneiver e screpins te bait, njenéiete jù e sbraia ntant:
"Mamo gei, ndulgeme, fum par trei egn faré!"
L'à fat coscita e apena che l'era l bait pien de fum l'é ruà la vivana e la disc:
"Vatene, Nema! che ades no tu as più da rumiar te chel bot."
Dapò la disc a chel tous:
"Da marena meti sora per trei e fa tosela, mìngol de amàite, pult con chegoze e bòzole de jeneiver, e varda che tu abie assà aga sgrijolada."
Dant marena l'à dit:
"Par Reza e soe soze, l bast as fat! No manar più demez nesciugn famà zenza nia, e fa semper dal bon a la jent, dapò te tegniré n ton e ades tu es delibrà."
La vivana era sparida pruma che l vacé à podù rengraziar, e l tous era varentà dal mal.