Lerät vonädikün
Lerät, keli konobs is, licinon de vön vönädikün.
Jen äjenon bü yelamilats anik in Pärsän. Hilepuls kil ilülogoms me logeds lelöfädik vomi lejönik yunik, ab fäd mifätik ikodon, das ebo i reg läna ilogom jipuli me logeds plidik. Kludo fät kilatanas älöfädöl suniko pilonon. Päcödetoms, ma süd ettimik, ad paforön.
Büä ledun äjenon, jilejönikan ye äplöpof ad miserükön regi sotefo, das äklienom ad säpönodön balani kilanas. Äbüedom kömön kludo ministerani gitäda, ed äbüdom atane ad leadön lifön e stadükön libio täläktikünani kilanas.
Nu ministeran gitäda ye ästadom in ditretül. Lio ökanom-li tuvön se kilatanas täläktikünani?
Äletikom dü tim anik, ed ädatuvom medi sököl ad reafön se fikul riskülik oka. Äbüedom kömön kilatanis ed ädajonom omes platotis vietik kil e blägiks tel. Täno äspikom: „Ofimükob se platots lul at bali sui bäk alana olas. Utani olas, kel balido okömom lü ob, ed osagom verätiko obe, köli kinik platot labon, keli labom su bäk oka, ed osevom ad plänön sekü kod kinik platot zesüdiko muton labön köli fa om pununädöli, utani olecedob as utan olas kil, kel dalabom täläkti mödikün, ed ostadükob libio omi emü kod at.“
Kilans no ädaloms spikön lü ods, no ädaloms givön odes malis, ed in lecem, in kel reto äzigoloms leliviko, sodas äkanoms logön platotis odsik, meds no ädabinons, dub kels äkanoms tüvön köli platota su bäk lönik okas.
Posä ministeran ifispikom, älepladom kilatanis näi ods ko logod äl völ, sodas no äkanoms küpön ni uti, keli äfimükom sui bäks oksik, ni utosi, kelosi fovo ädunom. Äsevölo somo, das äbinom sefik tefü logeds äspionöl valik, ministeran äklänedom platotis blägik tel ini bal pokas okik, ed äfimükom sui al bäkas kil, kels äbinons fo ok, platoti vietik.
Posä idunom atosi, blufam ärpimon. Hilepuls äzigoloms in lecem, älogoms föfaflanis e bäkaflanis odas, ab primo nonan ädabinom, kel äfägom ad tuvedön säkädi, kel äfägom ad konön, köli kinik platot su bäk lönik okik älabon, e sekü kod kinik atos äbinon soik.
Fino pos minuts zao degsbalan kilanas ästepom lü ministeran ed äsagom: „O klatal! ut, kel lagon su bäk obik, binon platot vietik, e kanob plänön ore, sekü kod kinik atos binon soik.“
Kin binon-li leigo so täläktik, äsä men yunik at, e kanon-li plänön, vio hilepul edagetom sevi oka?
Se Volapükagased pro Nedänapükans 1936, Nüm: 4, Pads: 27-28.