Les bones eghes di ladins
Les bones eghes di ladins
Le Signur Idî é cun düc bun;
cun so aiüt é döt sann y intun:
i vicí por aria, i romuns te tera,
i pësc dl mer y ciaussa y polam,
döt salta y scricia y fej na gran vera
a laldé le bun Dî che i mantëgn por döt l' ann.
A nos, püra jënt, a nos, püri ladins,
nes dál bëgn mius robes co a püri cuzins.
I ne n' ó cunté sö döt chël che godun
por grazia de Dî ch' é nosc gran patrun,
mo te bones eghes, te bones fontanes
ch' al â bele dé zacan ales ganes,
mësson bëgn reconësce y desson laldé;
a döt le monn le messesson cunté!
Podun avëi ci mal che orun
che öna o l' atra nes cuncia le magun.
Y os, püri vedli, che jëis col bachët,
os dal me sëch, passede Col Maladët,
sa Morin Rot da Calfosch a bëre ega,
y che fosses jön funz de Marou o a Longega!
Y sce sëis impedrí de valch vers, a Borjé
él na fontana! Ma jide a ciarcé!
Y spo a Pedraces, imper a Badia,
zënza bëre ega degun passa ia;
ara tofa da solper y da üs frac,
mo sc' an nen bër, devënton alegri y mec mac.
O plaies o valch ater bur mal
söla pel varësc döt a Romestluns da La Val!
O jide magari t' Al Plan de Marou
che sarëis sorvis sciöche fosses n prou.
Y le miú de düc, le bagn de Valdander,
che fej te cialdira na crosta de cënder.
Na te ega da bagn ne n' él nia dalunc
por vigni mal che brüj o che punj.
Dunca, vedli y jogn y mitans y mituns,
ne messëis ester mac y passé i confins -
sce jëis a bagn - de nos püri ladins,
porcí [ch'] ai á dit nosc poder y nosc prou
che te bones eghes ne n' él ignó!