Levüd
Volapük binon mekavapük tikavikün, jönikün ä neudikün; toä num Volapükanas nog ai binon smalik. Volapük gudik obas nog ai binon nesaidiko sevädik, sodas töbo riskobs ad pübon bukis Volapükik nulik. I gased obsik nog ai no kanon pagretükumön, bi num reidanas oka no nog evedon saidiko gretik pro atos.
O Volapükans e reidans löfik! Mutobs votükön stadi at. Volapükan alik muton kevobön me näm valik oka ad propagidön püki obas, ed ad slopükön limanis nulik. Steif Volapükana alik binonöd ad vedön Volapükan zilik, gudik ä fiedik. Lio obs valik kanobs-li dunön atosi?
Propagid oplöpon gudiküno dub lüpotam yegedas dö Volapük delagasedes topik. I noteds smalik oblinons benoseki. Dub duns somik Volapük ovedon sevädikum.
Slopükam limanas no binon fikulik. Men alik labon röletanis, labon soni u blodi, labon matani u söri,... In famüls obas, in röletanefs, in sevädanefs obas plad dabinon, kö Volapük obas muton glofön; ed us pö gebäd mudöfik püka obsik obs e Volapükans nulik obinobs suno Volapükans gudik. Volapükan alik kludo kanon lüblinön limanis nulik, if te labon vili ad yufön Volapüki.
Yufameds veütik ad vedön Volapükans gudik reid Volapükavödemas e spod in Volapük binons. Literat Volapükik fe binon nog pülik, ab Volapükans anik ya elautons ed etradutons konedis gretik, e märis, fabis e konotülis mödikis. Penäds at ye nog binons namapenädiks; öms onas ya pexamons e popübons pötatimo, ab ya nu spodan alik labon pöti ad kopiedön literati pepenöl at. Kludo alan kanon saidiko plägön Volapüki, if no plafon ad spodön Volapüko ed ad begön lüsedi penädas at. Somo frut spoda kanon vedön vemo gretik.
Süadob, das alutan, kel onolon gudiko Volapüki, i olöfon oni, ed oyufon pö propagid e slopükam. Klu ols valik kevobolsös! e fümiko orivobs zeili. Volapük lifonös!
‚Weiszkirchen‛.
Se Volapükagased pro Nedänapükans 1934, Nüm: 3, Pads: 16-17.