Lif e vol
In bäledub reg sembal esibinom; in ledom oma sapal Kerim elödom. Reg elöfom vemo omi ed emusamom oki viliko ke om. Vöno reg elofom Kerime säki somik: »ko kis kanobs feleigön lifi talik e voli?« Sapal no egepükom foviko, sod ebegom balidno tüpi plo del bal, poso plo dels tel, poso plo vig lölik. Fino ekömom al regi, ed esagom so: »säk ola, o monäkel, no binom pelivöl: kapäl fibik oba no kanom suemön omi. Dälolös obe, säkön menis sapikün.« E Kerim emotävom al sükön gepüki plo säk rega.
Begino evisitom zifi liegik sembal, kö esagon, das filosopel glolik us sibinom. Ab filosopel et elabom domi vemo bizugik, ebinom flen ladik rega, elifom it äso reg ed edlinom svidi lifa se köp fulik. Kerim elofom ome säki okik. Egepükom: »Mögos feleigön voli ko ledom bizugikün e lotikün, kö tab manifik aistanom ed alim kanom fesmekön. Sus kaps lotas stels süla lunidoms e goloms. Böds legäloms liloti omas me kanitems benotonik. Flols blädoms benosmeliko ple oms. Bifü oms stanoms bovs golüdik ko zibs su tabs, ed in köps vin skömöl nidom. Zümo valikos zados senis e lots yofik siedoms, musamoms okis, smiloms, cogoms, feitoms. E lots nulik kömoms egelo e spad sibinom plo alim. Kü ek esatom oki säto, sustanom, lädyulom etis, ko kels esiedom, e danasagöl linkipe demü linkipam, mogolom slipön domü. Eko lif talik binom.« Kerim no egepükom vödi bal filosopele, editom oki lügo ke om ed emotävom veitikumo. Oko emeditom somo: «o flen filosopel, mag ola no binom velatik. No valiks obs dlinobs, fidobs e gälobs okis ko lots; pötütöls, soaliks e dlenöls binoms i mödik is.«
Pesagos Kerime, das soalel devodik, miegik e sapik nilo elödom in fot solüdik. Ninovag ebinom löd oma. Eslipom su ston nüdik. Efidom te vulis ed edlinom te vati. Ünü del e neit valik eplekom. Kerim ekömom foviko al omi. Soalel esagom ome: «lelilolöd! Vöno tevel edukom kämeli da lufel. Süpito kämel ezunom, evedom natemöl jekiko, luvoköl e lefälöl oki. Tevel pajeköl efugom, kämel egonom poi om. Kipladi sävön oki? Lufel ebinom vagik. Ab elogom nebü veg fonadi vemo dibik ye nen vat. Se lined dagik oma ejonoms okis brobäls[1], kels esusaglofoms in slits völas, pategöls ko luspog bäledata. Pamoföl fa kämel lefopik tevel pajeköl elefälom oki in fonadi. Edagleipom tuigi blekik smabima ed elagom sus ledib. Susipolöl kapi, elogom cavi pamaniföl kämela: nim tugedik edesänom sumön omi. Elovesiadom logis disi fonad vagik: us dlak esnekom, lulogöl ko cav pötütik e valadöl, das odeslitom oki de smabim ed ofalom. Somo elagom su tuig slenik bevü nesans tel. E kisi elogom nog? In spad ot, kö vul smabima pefinom in slit völa, mugs tel, balim vietik e votim blägik, esiedoms kobo su vul ed etuetoms cenamo omi ko ledesid gletik; esöfoms gluni ed enüdamoms vuli. E kü glun ebösetom, lefalöl in dibi, luka dlak eloegom vifo, äsliko äspidom dasäkön, va mugs ulovetuetoms suno vuli e va smabim ko vet oma olefalom suno al omi in dibi. Ab kis binos?
Lagöl sus ledib jekik at, nen spel al savön oki, tevel elogom su tuig nilikün madikis bälis mödik. Elevipom nibön omis. Balo efögetom valikosi: ä kämeli jalepik sus om, ä dlaki dis om in dib fagik, e vobi badlik mugas. Löpo eletom luvokön kämeli, diso eletom snekön dlaki, e flano eletom söpön mugis gluni e tuetön vuli. Ed it eplökom bälis, efidom omis ed epölüdom jeki oma. Olensäkol: kim binom tevel misalöfik at? Men binom. Nekulivöp ko fonad: vol binom. Veg da nekulivöp binom lif talik obas. Kämel binom sin, tael lana, mekel yamas. Aitädom obis dubü neläbad, ab lagobs luletik su tuig blekik sus ledib, kö binom pesävöl in daeg sepa deil — dlak ot, kel emaniföl cavi aivaladom, das tuig slenik podiblekom. E kims binoms mugs?
Del e neit binoms nems omas. Nes takedön voboms ceno, al lovetuetön tuigi lifa olik, kel tuig bekipom nefiedik oli bevü deil e vol. Mug vietik tuetom dutiko ünü del lölik e mug blägik tuetom sömo ünü neit. Ed ol, pevenudöl dubü bäl benosmelik — dubü juit senamas, dubü satam vipas, efötegol sini — kämeli löpo, e deili — dlaki diso, e vobi vifik dela e neita — mugis tuetöls vuli slenik lifa. Efögetol valikosi, e te lejuit minutik lenzugom oli. Eko binom vol e lif e men deilik. Li-binol kotenik ko koned oba?« Kerim no egesagom vödi bal soalele, editom oki lügo ke om ed emotävom veitikumo. Oko emeditom somo: »o soalel sanik, dido koned ola binom siämik, ye no nog ecödatom säki oba. Lif obas no binom so lügik äs lufel, duköl te al ledibi — deili, e men no binom pevenudöl te dubü juit timilik.«
Kerim evegom semöpi. Eko ekolkömom teveli seledniko peklotöli ko luklöfs. Egolom nejukiko. Po jots oma pok ebinom, in kel bod e fluks ebinoms. Ejinos, das elabom kaladi yofik. Fasedöf elunidom in loged oma, känüd e fiedäl äsepetom oki lesamiko[2] in logod oma. Kerim etikom: »obisiadob säki oba ome; lumilagnikel at bo olivom omi.« Ed esäkom lubegeli: »ko kis kanon feleigön lifi talik e voli? »En labob konedi«, lubegel egepükom, »lelilolöd: sudomuedik sembal esagom bleinike: »ven ologol hapeli, begolöd omi kömön al obi, al yofön dubü pleden soni oba evedöli glümik.« Bleinik esagom: »ya elogob hapeli somik. Osedob meni nen futs al sükön hapeli, timilo otuvom omi.« Men nen futs emogonom ed etuvom suno hapeli. Hapel no elabom namis, ab no etodom ed emusigom medü hap, kel no elabom stinis, ed emusigom so jöniko, das son glümik sudomuedika esmilom. Elogöl utosi bleinik enokom ko nams. Sudomuedik elobom leliliko musigeli. Men no laböl futis edanüdom ed äbunom so, das mens mödik enakömoms. Süpito se möd stupel esegolom ed esepetom danöfi okik hapele, bunele e valikes votik. In tim at sapel ägolom stiliko bei oms ed ilogöl, kelosi mekon, elovepükom: »vol binom somik, smilik, nelisanik, misalöfik, ed in vol lif obas binom somik.« Li-binol kotenik ko koned oba?« Kerim no egesagom vödi bal tevele; editom oki lügo ke om ed evegom veitikumo. Oko emeditom somo: »koned ola binom fasedik, ye no elivom säki oba. Do kolkömobs in lif pleiti, stupi e neveladi mödik, ab i velat sanik e malam geilik peninöfoms in om fa lemekal gudlik.«
Kerim esludom getävön, al nunodön regi, das no eplöpos tuvön gepüki plo säk oma. Du geveg eplekom, dat God eklülom kapäli dagik oma ed elivom ome kläni lifa. Komü reg ekömom ko logod gälik ed ekonom ome valikosi, kelosi ililom de votiks. Reg esäkom: »fino, o Kerim, kisi niludol it?« Kerim esagom: «Balüdo dälolös lelilön, kelos ezidos ke ob du vegam. Pesevo, das te ma plüd geilik ola emotävob in vegi fikulik at. Pelesävöl dubü ben regik, vätopo elabob dukelis e zibi delik ed eplakob tupamis nonik. No onotob oli dö gudikos e badikos, kelosi ekolkömob du tevam, no zesüdos nunodön dö ot, bi utos valik binos nos feleigü ko benods tuik, kelis egivol obe, o reg oba. Elabob vipi lebalik: püdön oli ed ezilob tuvön velati bevü mens, al deblünön ole kalefi töbas oba. Nu ol it cödatolös ma velatäl regik: li-emelidob beni ola?« Pla gesag reg egivom nami Kerime as demali bena. Kerim ekidom lestimiko omi e poso elägivom: »du tevam etikob somo; sod nilöl al ledomi regik ola e gliföl, das nu getävob al oli, o reg oba, nen melid valik, süpito lä löd it ola äsliko jal edefalom de logs oba ed esuemob, das lif obas binom tevam in vol, al befulön vili löpikün rega geilikün.« Sapal enepükom e reg esagom ome: »o flen fiedik! des tim at binolöd fat oba.«
Penäd at penotükon balidnaedo ün yel: 1888 in nüm folid jäfidota: „Mulapenäd nebolitik: Volapükagased” (pads: 20—22). Lautot binon tradutod prosadik efe nen dakip metriga dila se poedot fa ‚Zhukovskij’ tiädü „Konots tel”.