Lifanunods tidanas Volapüka. Jiel Henriette Wolter (Vper)

Jitidan Vpa (10), jimatan kronalavogana: söl: ‚Hermann Wolter’ in ‚Osnabrück’, Hanofän.

Pemotob tü 1821, tobul, 8 in ‚Harburg’ len ‚Elbe’^[1]. Famülanem oba bü mat ebinon: ‚Wedekind’. Nu vilob penön hitidanes e jitidanes löfikes e lestimikes <Vpa> nunodi oba.

Steifülobsöd ad bepenön plakis obas tefü dins Vpa! Peneds obas okipedons jenotemi püka ebo ata, kel pedatuvon fa söl danolik: ‚Johann Martin Schleyer’. Bepenobsöd jenotis valik, ad stimön mani at, kele danädobs fredis vemo mödikis sekü datuv gretik oma! Te söl: ‚Schleyer’ balik ebinom tidan letälenik oba! Elabob ni vödabuki, ni gramati. Pianiko vöds anik püka nulik pebükons in gased almulik oma: „Siunahap” (= Deut. ‚Sionsharfe’). Epenob ettimo söle: ‚Schleyer’ lafo me Volapük, lafo me pük Deutänik. Söl: ‚Schleyer’ egespikom ai obe, ai jafölo vödis nulik ed ai ejäfom ad tidön sufädiko obi me spodakads ed i me penäd oka: „Siunahap”. Atos ebinon prim studa obik püka nulik e luveratiko i pro votikans valik, kels ettimo esevons gasedi at. Atos ebinon ün yel: 1879. Ün yel fovik gramat balid epubon. Buk at ägebidükon i vödabuki balid.

Kiogretik fred ebinon! Spodots pegudükumons ed espodob ko vomül: ‚Wirsching Angelika’, ed obs bofik esteifobs ad dagetön flenis nulik pro din gudik Volapüka. Ün yel: 1881 epubon yelod balid gaseda: „Volapükabled”. Söl: datuvan Volapüka < ecälodom ün muls balid balidis tidanis püka nulik. Ereidobs ettimo nemis sököl: ‚Lenze, Bauer (Bánfi), Wirsching, Emmert, Peitz, Ölschig, Loos’. Ün setul yela et: ‚Domicke, Jakobs, Wolter, Bräunig, Schultes’ ed ün novul dokan: ‚Obhlidal’ pecälodons.

Ün yel: 1882, efe ün gustul e setul söl: dokan: ‚Obhlidal’ pecälodom as cif^[2] balid Volapüka pro Lösterän; fovo pecälodons as cifs pro Vürtän söl: ‚Kniele Ruppert’ e pro Nolüda⸗Deutän ob it. Stük at: Nolüda⸗Deutän < no ebinon so gretik, äsä seimna idabinon fedatat Nolüda⸗Deutäna^[3]. Ebinob sevädik in Jlesvigän, Holstän, ‚Lübeck’, ‚Hamburg’, ‚Bremen’, in Braunjvägän, Loldänburgän, Hanofän ed in ziläk nilü ‚Harz’. Fikulosöv ad dilön stükis ebo etis. Nem et: Nolüda⸗Deutän < ebinon saido suemovik dü tim primik Volapüka, ibä ebinob ettimo jitidan balik in stük lölik.

Sosus söl: datuvan Volapüka < ecälodom obi asä jicifi pro Nolüda⸗Deutän, edutävob stüki oba ed evisitob in ‚Harburg’, ‚Hamburg’ e r. lädis ed i sölis, kels ettimo elebonedons gasedis Volapükik. Sis täv at oba num tidanas in stük oba emödikumon. Ons it olautons nunodis oksik, ye ob finükob nunodi oba ko vip: Söl: datuvan Volapüka lifomös! e Volapük löfik obas lifonös! e glofonös!

1888.

KÜPETS REDAKA. (Vükifonät)

1. Nu el Harburg: dil zifa: ‚Hamburg’.
2. Änemoy ettimo as cif presidani Volapükakluba u Volapükaklubas valik läna, reigäna, … Cifal pälecedon „cif cifas” somik, kludo titul at egeton poyümoti: ⸗al.
3. Ba el Norddeutscher Bund.

Se Vög Volapüka 2024, Nüm: 8, Pad: 66–67.