Lifanunods tidelas volapüka. Bernhaupt Josef
Bernhaupt Josef pemotom 1836, telul 5. in Hitzendorf, pag smalik in Stirän, kö fat oma ebinom mitan. Yels tel poso paels oma egoloms ali Graz, glezif jönik Stiräna ed evedoms us lotans. Pul liflik estudom in zif at yels fol in beginajul, yels lul in gümnad, kö elenadom ko zil mödik pükis latinik e bäleglikik, yels tel in jul realik e yels kil in lejul kaenik. Estudom nebo yels mödikum musigön medü violin e pianofod ed elenadom i tälapüki e flentapüki.
Volut in yel 1848 emekom ninpedäli gletik pule ko lifayels balsetel ed esetenom vemo kapäli oma.
In yel 1859, pos klig, etevom ali Verona ed ebeginom studi literata tälik; egetom cali as domatidel in famül cädik. In balsebalul yela 1860 egetom cali as potaplagan in Padova ed eblibom us ti yels mäl. Ematom Luidi Rech Dalprà, vomüli zadik e pedaduköl vemo gudiko. Bernhaupt ebinom vemo kotenik dö mat at ed aisagom i nu, das binom matan läbikün tala. In yel 1866 emutom lüvön zifi Padova ed egetom calapladi in Brixen (Tirolän), kö eblibom muls fol jü lul. In yel ät egetom calapladi nulik in Graz ed eblibom usit jü yel 1870. In balsebalul yela at pelovepladom ali Pola, zif e pof möla löstänik in Sitän, kö emekom pubön deutapüko e tälapüko gasedi vigik nemü »Neptun«. Beginü yel 1872 pelovepladom ali Alexandria in Ägüpän, ed in yel 1875 ali Beirut in Sürän, kö nu nog dilekom potacali löstänik. Bernhaupt elogom in Alexandria, das mens netas difik lifoms kobo usit, e das fomoms sogefi ko steifs otik, äslik valöpo, ab das kodü püks difik ailaboms töbi gletik, kapälön balvoto okis. Bernhaupt edesänom sikodo lautön püki sembal valemik, ab etuvom lesuno, das volekam ployega at binom levemo fikulik. Pük valemik oma emekom te mostepis nemödik. In yel 1883 elilädom in gased »Die Post« dö volapük fa Schleyer J. M. ed epenom foviko söle Schleyer. Nag egetom glamati ota estudom volapüki ko betikäl gletikün. Du dels kil elenadom glamati ed epotom spodakadis e penedis in volapük ali söl Schleyer. Esedom ome i valapüki okik ko beg, jedön oti ini fil, sosus ulilädom omis.
Bernhaupt egetom dipedi as vpatidel nüm 32 in yel 1882, telul 1.; dipedi as löpatidel nüm 9 in yel 1886, balsul 29. e dipedi as plofed nüm 3 in yel 1887, kilul 7.
Du tim at epenom laltügis mödik in gaseds difik, pämi dö volapük, kel pelobom fa söl Schleyer in Volapükabled, nüm 48, e plägabuki in püks lul segun tidamod plofeda Ahn.
Dunöf at ebinom jeno gletik ed eläpolom mödiko al pakam vpa. Bernhaupt pevälom id as kademal plo Sürän pötü kongef äyelik in München. Du steb oma in Alexandria elivom i prämasäki, keli klub tedanas in Wien imaniföfom ed egetom prämi telid.
Se Mulapenäd nebolitik: Volapükagased 1888, Nüm: 7, Pads: 40–41.