Lifanunods tidelas volapüka. Cholin Ivan
Cholin Ivan, pesevöl in Rusän ed in selän as pakel zilik vpa, edeilom 1889, balul 28. (telul 9.) in San Petersburg. Cholin pemotom 1861, balul 2. in Lipezk, govaziläk Tambov, kö fat omik elabom fablüdi smalik litotas väkik. Cholin, ivedöl nepal du cilüp, elenadom in stid tidelik de Yekaterina in Tambov, kö efinom tidüpi in yel 1879 as julan balid ed egetom as somik mesedi kösömik — gloki silefik. Eplöpos suno ome pacälön as tidel pagik in pag Malaya Lasovka, kö egovom kädi lugivik-spälik feilanas ed etuvom timi lefulön kulivi okik dubü itastud yufü bukakonlet gletik guedalabela Osnobijin.
In yel 1885, pinunöl dö datuv de Schleyer elenadom volapüki, e logöl lefulniko veüti oma plo füd, evedom pakel zilik vpa. Ebinom balid, kel epenom glamati vpa plo rusänans, kel i jünu gudikün binom. Efünom stabi pakama fovoik vpa in Rusän dubü laltüg plobik oma, epuböl 1885, balsebalul 14., in gased mödiküno palilädöl in Rusän: »Novoye Vrämya« e dubü glamat penömodöl. In yel 1886, pecälom danü vpaflen oka in govöp leloda petersburgik-varjovik in San Petersburg, e pos yel bal pecälom as spodal löpik (sekretan) in govöp sefakopanöma ta filedadäm »Salamandra«, kö etuvom löfi e lestümi valemik in tim blefikün.
In yel 1887, zülul 27., ematom vomüli Odnosumov Maria, keli eseivom dubü spod volapükik.
Vo, pal at binom somik, kela lif pebeflumom mödiküno dubü vp.! Läb omsik no esötom dulön lonedo.
Balul 31. (telul 12.) esepon funi mana yunik pöstimöl e gudik at, kel edeilom sukü luegip.
Calablods ekösekoms lememe oma festuni jönik metalik, e bevü deks votik sepa omik ebinom i giv siämik, flolem se yebs violetik e glünik ko tan golüdik.
Takedomös in püd!
Se Mulapenäd nebolitik: Volapükagased 1889, Nüm: 3, Pads: 17.