Lifanunods tidelas volapüka. Cyprian Martin
Pemotom as son länedana in yel 1824, zülul 30. in Lužna (Lujna) lä Rakonitz in Bömän. Ävisitom ünü yels 6 pagajuli bömänik motöföpa okik, kö äbinom julan gudikün. In lifayel jölid omik äbölüdom fati okik, e mot omik ägivof omi in lifayel balsetelid oma plo yel bal in juli deutik in Kounowa, al lenadön deutapüki. Poso ävisitom juli popik e juli realik deutik in Rakonitz ko sek gudikün.
In yel 1844 änütlidom in lejuli kaenik in Prag, keli äfinom lölo in yel 1850. Sukü noladlan okik ästudom is, pla bodastuds, tidayegis libik mödikum sa püks anik, ed äsiedom ed ästudom i dutiko in bukakonlets.
In yel 1850, novul 14., pälasumom in tatadün löstänik plo fablüdam tabaka as plagan pelemesedöl ed ädünom in Wien lä dileket, tän in fablüds tabaka in Sedletz, Iglau e Göding. In yel 1852 ävedom calan fablüdama (Assistent) ed äkömom ini fablüd tabaka de Winniki in Galizän, in plovin kö stebom jünu.
In yel 1856 ämatom jipolänani Bott de Pierot Amalia, cili soelik govela limepik, kelof ämotof sonis tel ome, Emil e Teofil, e jisonis tel.
In yel 1861 pedanemom as löpacalan (konöman) in Monasterzyska e latumo in Winniki. In yel 1869 ävedom boxamel (Kontrolor) in fablüd e lä ninlem tabakabledas in Zablotow e päfödom isit al dilekel in yel 1873.
Atüpo (yel 1888) binom dilekel tabakafablüda e ninlema tabakabledas in Monasterzyska (Galizän) in dinitaklad jölid.
Tefü pesevüg ko volapük panoetos sukölosi: Ya in yel 1848 Cyprian älilädom dö steifs filosopela Leibnitz, al stukön väpüki, e sis tim at ämeditom sotimo dö sit püka somik. Äbinom sikodo pelegälöl, ven calan söl Köhler Wilhelm se Wien in yel 1885, telul balid, äbetidom omi dub glamat smalik e Volapükabled, das söl Schleyer ävolekom döli de Leibnitz. Volapük älensmülom omi so löfliko, äs jipul löfani ofik, e nolöl lebeno töbi e timi kimik lenadam püka sembal kostom, ebeginom deno in lifayel 61. omik studön väpüki at. Älonom fegebön alos vendeladüpis latik e gödeladüpis des 4 jü 6, kelis elso efelifom nepöfüdo in bed.
Begino lulul 1886 äpenom penedi balid lonedikum in volapük len cif, söl dokel Obhlidal, kel äbelobom omi me pened nüm 841 de 1886, lulul 7., ed älasumom omi as kopanal kluba balid löstänik in Wien-Meidling.
Pos lenadam vpa du yels tel Cyprian ägetom dipedi tidela nüm 431 de 1887, lulul 24., ed in yel öt eti löpatidela nüm 77. In yel 1888, zülul 17., ävedom plofed tonü diped nüm 50.
Plo pakam vpa vobädom: 1. Dubü siv glamatas, vödabukas e bukas votik sa gaseds mödikum volapükik e dubü lugivam e legivam literata volapükik pösodes difik. 2. Dubü sedilam zülagas e sezügas se gaseds flenes omik. 3. Dubü stigam studelas, calanas e tedelas mödikum al lenadam vpa, de kels liedo nonikan evedom volapükan zilik. 4. Dubü spod ko volapükans in Löstän, Deut, Flent, Spän, Täl, Rusän, Dän, Beljän ed in Melop. 5. Dubü penam laltügas plo »Volapükagased«, »Cogabled«, e me ninsedam e livam rätas gletavik in »Nogan volapükelas in Beljän«. — Redak timableda at ägivom ome plo livam rätas mödikün du yelüp balid prämi pelonöl. I plofed söl Hansen Wilh. elasumom koni jenavik pelautöl fa om in vobuk okik: »Konlet konedas e konilas fa volapükels sikikün«.
Sukü deklienug polänanas ta püks foginik, sesumü flentapük, ab no äbinos mögik ome stabön klubi volapükik in lödöp omik, zifil Monasterzyska.
Se Mulapenäd nebolitik: Volapükagased 1888, Nüm: 12, Pads: 68–69.