Liladels lestimik!

Milagobs datuvali talenik vpa, vobi gletik pükavelas e kadema e valikosi kel padunos dubü literat vpk. Ab plo kis atos valik pöfüdos, ven deno logobs, das num vpelas vedom smalikum in läns ti valik, ven nited vpa palunom bevü kopanals klubas, ven spod plivadik vedom seledikum, ven nevpels mödikün klödoms, das vpadin lölik edeilom büfü lonedo, bi no senitoms sibni omik?

Somo dinads stadoms liedö, e kod veütikün binom zelado neplagöf. Vpels skilik mödik fögetoms lefulniko, das vp. binom popadin (no din plo nolels), e voboms plo gälod omsik lönik pla vobön plo din; penoms stüli, keli te „sevels pükas mäl“ (!) kanoms kapälön, e steifoms al mekön vpi fikulikum (u bekipön omi so fikulik äs binom) pla vobön plo nefikulam. Dubü atos jekoms kopanalis se klubs, jü klubs ninoms te kopanalis nolelik, mens kels no nedoms vpi!!

Ab i in mod votik neplagöf pubom: Glezeil vpa mütom binön nefikulön fetanami bevü nets difik pato dubü yufön tedi e dustodi; ab ven logon li nemödikos pedunos al blöfön jäfeles, das labobs zeili plagik, e das vp. kanom pöfüdön plo oms, täno seniton, das sugiv at evedom smazeil pla glezeil.

Atos binon bal pökas gletik, e us kod binom, das labobs slopelis ti nonik de tedelef. Sikodo, if desidobs, das vp. ovikodom in tim obsik, no dälobs luletön sugivi at; yufü fetanam e noganam (organisation) fimik mütobs jonön jäfavole, das kanon rivön pöfüdis plagik dubü vp. Balad e vob tugedik mekoms stenüdik, ab nen oms vpadin lölik ostopom ba, sodas obs no olabobs fluki de vob obsik.^[1]

Bled at obeginom i jäfön flani at dina. Binob it jäfel (lejülafablüdel), e ebepükob disinis obik ko jäfels votik; jäfels at ismiloms büo tefü vp. e iklödoms, das lölikos äbinos lupükot, fänot jönik ba, ab no pöfüdikos u plagikos anik; ab lilöl anu dölis obik nulik ästopoms smilön e äsagoms, das, if äkanob dudükön somikosi, älenadomsöv vpi ünü dels 14.

Eko disins at: Mekobs tedadomis ninsädön dö cans oksik in bled, ab te tedadoms sikik e cans gudik, sodas binos obs it, kels komedobs canis omsik vpaflenes obsik. I no getobs moni plo ninsäds - no komedobs canis badik al melidön moni (demü mon) -; ab flagobs detumis de selaninsum, sodas getobs moni nonik, if nos paselos dubü obs, ab mödiki, if mödikos paselos. Stips somik palensumoms fa tedadom alik, sodas anobs it sevälön flamis gudikün. Tefü cans ninsädiobs pato dö cans pöfüdik, rigalik, kels etuvoms ya pakami in selän. Kludo, liladels lestimik, kanols konfidön sefiko ninsädis obsik, e spelobs, das mödiks de ols opotoms obes bonedis, kelis obs poso oblinobs flames tefik. - Obinos gudikün, if liladels obsik okanoms mekön tedelis anik selön egelo canis obsik; blüfacans popotoms, e rabat kösömik pogivom tedeles somik. Dubü atos ojonols vili olsik balada e voba tugedik, e oduinols düni gletik obes e pato vpadine no te in tedelef Däna, ab i bevü tedels länas olsik lönik.

L. P. Jansen
redakel e pübel.

Se Volapük: Popabled e ninsadabled 1890, Nüm: 6, Pad: 22.

NOETS.

1. Tefü atos log. »Nunal« nüm 13, 1890; ninom mobis plagik difik pepenöl in stül boso kapälnikum ka stül kösömik bleda et.