Linglänan lekäfik
Bü degats yelas, ven in Nolüda-Merop trens ze no nog ädabinons, sog tävanas äseadons in dilijan, kel äbinon ettimo vaiböm kösömik pro fagots gretik. Ünü düp bal ölükömons ini stebedöp, kö pöt ädabinon ad staudön. Bal hitävanas änunedom tävakompenanes oka, das lotidöpan lotidöpa et ai äbötom lotanes oka zibädis lehitik. „Töbo olabols timi ad fidön bosi supa, e galedan dilijana malom detävi. E do ufidols ze nog nosi, ga omutols pelön fidedi lölik. Spikob plako,“ tävan finükom nunedi oka.
„Atos no ojenon pö ob,“ Linglänan äsagom.
„Lesiob ole, das binos soäsä sagob. Ob it eplakob osi, ed elelilob osi de votans, kels ebelifons plaki ot,“ votikan nogna änunedom.
„Atos no ojenon pö ob. Ogetob cani gudik tä mon obik,“ Linglänan älaidälom, e petakedükölo dub vöds at, kels äjonons kleiliko fümäli, tävans faemik äsludons ad riskön osi ed ad fidön bosi in lotidöp.
Ya suniko äklülikos, das tävan balid ödagetom gideti. Sup päböton lehitiko, e do boveds no nog äbinons lafo vagiks, malet detäva ya pägevon. Tävans anik älöädons, ab no Linglänan takedälik, kel älaifidom takediko. Pos timül anik ye, ven galedan änükömom vutiko, pösods retik älöädons vifiko, äpelons spidiko fidedi, keli no ijuitons, ed äxänons ini dilijan.
Takediko Linglänan äloegom devegön dilijani. Nes spidön älaifidom, ed äsivom pos finod nog bovi ko krem züdöfik e biskutis anik, kelis lotidöpan pos taed mödik fino äbötom.
„Atos valik binon klüliko gudik,“ Linglänan nu spikom, „ab nu vilob bo nog labön spuni. Ga no fägob ad fidön kremi me nams obik!“
„Spuni-li? Kis atos binon-li? Änu is spuns mödik ädabinons. Kiöpo tabalargentots valik oba binons-li?!“ man äyamom.
„O! änu sog gretik äbinon is, ed at edetävon muspidiko...“ Linglänan ägespikom, ab lotidöpan ya no ädalilom lunüpikumo. As sagit de car ärönom lü lecek, äbüdom balani dünanas oka ad bexänön jevodi, ad rivön monitölo dilijani ed ad büdön galedani ad gevabön.
„Binos läbik,“ man igekömöl äsagom Linglänane, kel ädaifom me krem, „das dilijan duton lü ob. Nu bo ogegetob largentotis obik.“
Ven pos düpafoldil vab ästanon dönu fo yan, ämaifükom zuniko vabayani, ab büä nog ikanom sagön vödi bal, Linglänan äpladom nami oka sui jot omik, ed äsagom: „If sukol tabalargentotis olik, logolös täno ini kafaken! Ini at epladob onis.“
„Deli gudik! o söls!“ äsagom pos atos, du äseadikom takediko. „Fided ebenosmekon vemo pö ob, e mutob sagön, das egetob cani gudik tä mon obik!“
Se Volapükagased pro Nedänapükans 1946, Nüm: 5, Pads: 32-33.