lipu kule/lipu kule li kama lon

by jan Ana

lipu sin pi toki pona li kama lon. nimi ona li ‘lipu tenpo’. jan pali pi lipu tenpo li wile pana e lipu sin lon tenpo mun kama. toki pona la, ona li lipu nanpa wan sama ni.

jan lawa pi lipu tenpo li toki e ni: “sina wile sitelen tawa lipu ni la, o sitelen ala e ijo pi nasin jan. sina ken sitelen e ijo lon tenpo ni. taso, sina ken ala pana e pilin sina lon sitelen sina.”

ni li ike tawa mute lon kulupu. waso pimeja li toki e ni: “sitelen ale li nasin jan. jan li sitelen e nasin lon la, ona li pana e nasin ona tawa sitelen. sina alasa pake e nasin jan la, nasin jan li awen lon; taso ona li pona tawa jan ike taso. kin la, ni li pake e wile pali pi jan mute. ni la, lipu tenpo o kama wile e sitelen pi nasin jan.”

taso jan lawa li wile ala kute. ona li toki e ni: “mi mute li toki lon insa tomo pi jan ale ala. mi wile ala ante e lawa pi lipu ni. lawa pi nasin jan taso li ken ante.”

jan Jan li toki e ni: “jan lawa pi lipu ni li pali ike. ona li ken ala lawa pona e kulupu. lawa o ante. lawa li ante ala la mi weka kan pali mi.”

lawa li toki e ni tawa kulupu: “sina wile ala wile ante e lawa?” jan mute li toki e ni: wile. lawa li toki e ni tawa jan pali taso: “sina wile ala wile ante e lawa?” jan pali li toki e ni: ala.

tan ni la, lawa li ante ala. ni la, jan Jan li weka tan kulupu ni, kan pali ona pi lipu tenpo.

jan Jan li pali e kulupu sin. jan mute li kama tawa ona. kulupu li pali e lipu sin. nimi ona li ‘lipu kule’. ona la, sitelen ale pona li ken lon. tenpo ni la, kulupu li lili; taso, ona li ken kama suli li ken kama pona tawa ale.