lipu kule/nasin nanpa mute li lon

←

lipu kule (2021)

nasin nanpa mute li lon by jan Kita

→

tan lipu lipukule.org/post/2021/09/21/nasin-nanpa-mute-li-lon

282996lipu kule — nasin nanpa mute li lon2021jan Kita

nasin pi toki pona la, ijo pi wile suli ala o weka. nanpa li ijo ni. tenpo mute la, jan li wile sona e ni taso: ijo ala anu wan anu tu anu mute li lon? kulupu Wapili li jo e nimi ni taso, li awen lon pona.

ni la, nasin nanpa pu li ike tan wile. jan Sonja li wile e ni: sina wile ala toki e nanpa suli. kin la, tenpo pini suli la, nimi luka en mute en ale li nimi nanpa ala!

taso, jan sin li sona ala e ni. jan sin li wile toki e nanpa, li pilin ike tawa nasin nanpa pi toki pona, li wile pali e nasin nanpa sin.

nasin nanpa pi kama wan
nasin nanpa pu li nasin nanpa pi kama wan. sina toki e nimi nanpa. jan kute li wan e ona, li sona e nanpa.

jan pi mute lili li pali e nasin nanpa sin ni; taso, jan Misali li pali e nasin pi nanpa luka wan. ona li kepeken nimi ni:

wan en tu li sama nasin pi toki pona
luka li tu tu wan ala, li tu tu tu (ni li nasa suli ala; mi toki e tan lon tenpo kama)
mute li kulupu luka pi ijo luka (li sama mute luka luka luka wan kepeken nasin pu)
ale li kulupu luka pi ijo mute

nasin pu la, mute li luka tu tu; taso ale li mute tu tu wan.
nasin ni la, mute li luka tu tu tu; ale li mute tu tu tu kin! (kin la, luka li wan tu tu tu.)
nimi nanpa suli li sama nimi nanpa lili tu tu tu.

nasin nanpa pi suli lon
nasin pi kama wan la, luka li nanpa sama lon tenpo ale. taso nasin nanpa pi suli lon li pakala e ni. o lukin e poki suli ni:

ale	mute	luka	wan
ala	wan	wan	tu wan

ona li toki e ni: o jo e nimi sewi pi mute pi nimi anpa. (jan li sona e suli nanpa li tan lon ona.) ni la, o jo e ale ala, e mute ala, e luka tu, e wan tu wan. nanpa tan pali ni li mute luka wan wan wan kepeken nasin pi jan Misali, li mute mute luka kepeken nasin pu.

nasin nanpa pi suli lon li toki e nimi anpa taso, e nanpa lili. (nanpa lili tu tu tu ante li lon nasin ni: “ala” en “wan” en “tu” en “tu wan” en “tu tu” en “luka”.) nanpa lon poki suli ni li kama “wan wan tu wan”. taso, jan li toki e ni la, jan ante li kute e ni:

ale	mute	luka	wan
wan	wan	tu	wan

ona li ale mute luka luka wan kepeken nasin Misali, li ale ale mute mute mute luka kepeken nasin pu. ike a!

ni la, mi wile e nimi wan tawa “tu wan”, e nimi wan tawa “tu tu”. nimi ken li “tuli” li “po”, tan toki Inli (sama nimi wan sama nimi tu). tenpo pini la, nimi ni li lon nasin pu kin! taso, nimi “tuli” li sama nimi “tu li”; ni la, jan mute li kepeken nimi “san” tan toki Sonko.

ni la, nanpa li kama ni:

ale	mute	luka	wan
ala	wan	wan	san

jan li toki e “wan wan san”. jan kute li sona e nanpa. ale li pona.

sina ken nanpa lon luka sina kepeken nasin nanpa pi suli lon, kepeken nasin ni: palisa pi luka wan li nanpa e wan, palisa pi luka ante li nanpa e luka. palisa tu tu wan li pana lon luka wan la, sina wile pana e wan sin la, luka ni li pini; o weka e tu tu tu tan luka wan sina, o pana e wan tawa luka ante. ni la, luka li tu tu tu; sina jo e tu tu tu la, sina pini e poki nanpa ni.

jan li lukin e mute palisa taso la, sina ken nanpa e luka wan tu tu taso. nasin luka ni la, sina ken nanpa e “luka luka” (mute luka luka luka lon nasin pu). nasin ni li ken toki e nanpa suli kepeken nimi mute ala. kin la, nimi nanpa suli li sama nimi nanpa lili luka wan la, sina ken pana e poki lili sin! o lukin:

mu	suli	ale	mute	luka	wan
wan	ala	ala	ala	ala	ala

mu li suli luka wan. suli li ale luka wan. sina wile toki e nanpa ni kepeken nasin pu la, sina wile toki e ale mute mute mute luka luka luka tu, e mute mute mute luka luka luka wan namako! ni li nimi mute a! taso jan pi nasin pi suli lon li toki e wan ala ala ala ala ala taso. ni li wawa pi nasin nanpa ni.

nasin nanpa sin mute li sama ni, tan ni: jan mute mute li sitelen e nanpa kepeken nasin nanpa Alapi pi suli lon. ona li kepeken nanpa lili luka luka, taso jan mute pi toki pona li kepeken nanpa lili luka wan tan toki pi jan Misali. ilo li kepeken nanpa lili tu; nanpa lili ona li wawa ala li wawa.

nasin nanpa nasa
mi kama sona e nasin nanpa sin la, mi pana e ona tawa lipu mi pi toki Inli. nimi ona li “nasin nanpa ali ike” tan ni: nanpa li ike, a a a! (mi pali e lipu “nasin nanpa ali ike” la, mi kepeken nimi ali; tenpo ni la, mi kepeken ala ona. taso, mi awen e nimi tan ni: ona li toki e ni: lipu ni li tan ala jan pi lipu “nimi ale pona”.)

ni la, mi kama sona e nasin nanpa nasa mute. ona li nasin nanpa pi kama wan ala, li nasin nanpa pi suli lon ala, li sama ala nasin nanpa toki ma.

jan mute li pali “sin” e nasin ni: nanpa lili li lon open pi nanpa suli la, o wan ala e nanpa tu ni, o mute e ona. nasin ni la, tu luka li luka pi kulupu tu. tenpo sike pi pali pi lipu ni li ken mute ale mute wan.

nasin pi jan Guymacu li sama lili. ona la, nimi wan en nimi tu taso li lon, taso nimi tu li mute e nanpa: tu tu li awen tu tu, taso tu tu tu li luka tu wan. ijo luka luka tu wan li lon la, jan li toki e ni: jan tu tu tu en jan tu tu en jan wan.

nasin pi jan Emalan li nasa mute ala, li nasin nanpa pi suli lon pi nanpa tu tu tu pini.

nasin nanpa pona tan jan Kapilu tan jan Tepo li sama nasin nanpa pu, taso nimi ale li mute e nanpa monsi ona. tu ale li sama ale ale lon nasin nanpa pu. tu tu ale mute li ale ale ale ale mute. mute ale ale tu li ni: mute pi kulupu ale pi kulupu ale en tu. (ale ale tu li awen ale ale tu, tan ni: ni la, nasin nanpa pu li pakala ala.) nasin nanpa pi toki ma en nasin nanpa pi toki pona Epansa li sama lili nasin ni, taso ona li kepeken nimi namako.

taso jan mute la, nasin ale ni li ike, li pakala e kon pi toki pona. sina pilin sama la, sina ken kepeken nasin ni: wan li wan. tu li tu. tu wan li mute. kin la, nanpa ale pi wan ala pi tu ala li mute. nasin ni li pona nanpa wan.

This work is available under the Creative Commons CC0 1.0 Universal Public Domain Dedication.
The person who associated a work with this deed has dedicated the work to the public domain by waiving all of his or her rights to the work worldwide under copyright law, including all related and neighboring rights, to the extent allowed by law. You can copy, modify, distribute and perform the work, even for commercial purposes, all without asking permission.