lipu kule/nasin pi utala meli mije

by jan Olipija

o sona e ni: mi toki e ike tawa meli, tawa mije, tawa tonsi, tawa jan kule.

tenpo li kama li pini la, kulupu li kama ante. jan mute li wile e ni: kulupu li pona tawa jan ale. taso en tenpo lon en tenpo pini la, ni li lon ala. kulupu li ike tawa jan mute. pakala ante mute li lon. nasin pakala wan li nasin pi utala meli mije.

tenpo lon la, jan mute li alasa weka e nasin ni. taso - en nasin li awen lon lawa ona, lon pali ona, lon toki ona. tenpo pini la, ona li lon lawa pi jan ale a. taso ona li seme?

toki Inli la, ona li nimi ‘Oppositional Sexism’. ni li pana ala e sona tawa sina la, o ike ala pilin. jan mute li sona ala e ona.

nasin pi utala meli mije la, ‘en meli taso en mije taso li lon. ona li lon tenpo ale. en sijelo pi ona tu en pilin pi ona tu en nasin pi ona tu li ante. jan li ken ala meli mije li ken ala mije meli li ken ala tonsi. en nasin mije en nasin meli li ken ala sama. ona tu li ante ale li utala.’

jan Julija-Sewano (Julia Serano) li toki mute li sitelen mute e ni. ona li meli li tonsi li ken olin e meli e mije e tonsi. ona li sitelen e lipu Wipinki (Whipping Girl). lipu ona li toki nanpa wan e nasin pi utala meli mije li nimi e ona.

nasin pi utala meli mije li mama e jaki ante mute.

ona li mama e ike tawa meli tan ni: ona la, ‘mije li wawa li suli li len mije e sijelo li pali mije. ona la, meli li wawa ala li lili li len meli e sijelo ona li pali meli. en wawa en suli la, mije li lawa la, meli li kute. meli li wawa li suli li lawa li kute ala li len mije e sijelo ona li pali mije la, ona li lon nasin mije li kama sama mije li meli mije li pakala li ike li jaki. mije li wawa ala li suli ala li len meli e sijelo ona li lawa ala li kute e jan sona ante la, ona li lon nasin meli li kama sama meli li mije meli li pakala li ike li jaki’

en len meli en len mije en pali meli en pali mije li seme? ona lawa kin e ni.

ona li mama e ike tawa jan pi olin kule tan ni: ona la, ‘mije li olin taso e meli. ona la, meli li olin taso e mije. meli li olin e meli la, mije li olin e mije la, jan li olin e meli e mije e tonsi la, ona li pakala li jaki.’

ona li mama e ike tawa tonsi tan ni: ona la, ‘mije li sijelo mije len mije e sijelo mije ona li kule mije li awen mije. meli li sijelo meli li len meli e sijelo meli ona li kule meli li awen meli. meli mije en mije meli li jaki. jan li ante e sijelo ona la, ona li powe li jaki. tonsi li powe li jaki.’

ike ni ale li ante. taso mama ona li sama. ni ale la, en utala pi kama pona meli en utala pi kama pona mije en utala pi kama pona tonsi en utala pi kama pona pi olin kule li wawa lon poka. utala li wan taso li poka la, nasin pi utala meli mije li awen lon li mama sin e ike ale ni.

o utala wan.

nasin nasa mi

• [en ijo laso en ijo loje] li sama [ ijo laso en ijo loje]
• nimi sin li lon lipu ni.

tan jan Olipija [o. li: pi: a.]

lipu Wipinki (toki Inli): https://en.wikipedia.org/wiki/Whipping_Girl nasin pi utala meli mije (toki Inli): https://www.juliaserano.com/terminology.html#O