Lo hoeite comte de Foix (Roger-Bernard III)
Mossen Roger Bernard foc lo hoeite comte de Foix et fil de Mossen Roger et de Madona Brunisen de Cardonna, foc marit de Madona Mengard de Narbonna, foc feyt comte l'an MCCLVI, et foc valen cavalier, pros et ardit et deserec anar contra los Sarrazis. Et, en l'an MCCLX, lo rey de Fransa avia feyt assemblar a Paris, al temps de Pasquas, baros, prelats, cavaliers de son realme, per so que lo papa lu avia escrit et mandat per so que los (Tartares) a las partidas de la Terra Santa d'outra mar eran venguts per (secorer) los Sarrazis et avian soubmes Arminia, Antiocha, Othe, Triple, Damas, Alapa, et tropas autras terras, et que perilh era de la ciutat d'Acre cum a la Crestianitat. Per so lo rey ordenec que y anessan ab gran nombre arquiers, balestiers et gens d'armas, on foc lo comte de Foix ab d'autres seignors del realme per deffendre la ciutat d'Acre. Et Mossen Gaston de Bearn foc capitani de la artilharia del rey.
Aqueste Mossen Roger Bernard aguec doas filhas, la una, Madona Agnes, que foc molher de Mossen Esquivat, comte de Begorra, et l'autra Madona Phelippa, que foc molher de Mossen Arnaud d'Espagna, vescomte de Cozerans, en l'an MCCLVII; et loqual Mossen Arnaud d'Espagna metec en la ma del comte de Foix la villa et terra de Sant-Girons. Lo dit Mossen Arnaud al comte de Begorra la liurec seignoralamen, (que) la recevec en fiu de lu, cum (appar) per la lettra qu'es al quaisso de Bearn, en lo cartulary de Foix.
Aqueste seignor comte aguec un fil Mossen Roger Bernard et moric vengut que foc de la Terra Santa l'an MCCLXII, et foc comte sieys ans.