Lo nove comte de Foix (Roger-Bernard III)
Mossen Roger Bernard, fil de Mossen Roger Bernard et de Madona Mengard de Narbonna, foc marit de Margarida, filha de Mossen Gaston de Bearn, laqual prenguec per molher l'an mil CCLII, et foc feyt comte l'an mil CCLXI. Et apres, per la succession del heritatge de Bearn et de Begorra, lo comte de Armanhac se opposec per sa molher et comensec pleyt, et fec mettre lo comtat de Begorra en sequestra jus la ma del rey et aguera lo pays de Bearn et las autras seignorias; mas no eran de aquela obediensa et, per so, comensec la guerra que tant a durat. Et apres, en l'an mil dos cens septanta un, Mossen Phelip, rey de Fransa, fil del rey Sant Loys, al comensamen de son regne, fasia fer certas oppressios et adjornemens personals contra lo comte de Foys per un seneschal de Tolosa, appelat Estachi Beu Marchez, et asso a la persecutio de aucuns sos ennemics, alsquals lo comte de Foix no volguec obeir. Lo rey en persona, ab sa poissansa, et lo rey En Peyre d'Arago, son sogre, venguen a Tolosa ab intenta de invasir lo comtat de Foix. Mossen Gaston de Bearn y venguec al secors del comte de Foix. Lo rey de Fransa prenguec lo comtat de Foix jus sa ma; lo comte de Foix et la comtessa se metten a sa mercy et foren menats en Fransa et detenguts jus lo arrest per aucun petit temps. Et apres, lo rey, a la supplicatio de la comtessa de Foix, sa cosina, perdonec lo comte de Foix de toutas quantas causas aquy aquel jorn, contengudas en las lettras reals contra lu ny sos officiers, et per la contumacias en que era estat pausat, que ancs demorar dos ans en subsidi de la Terra Santa de outramar, et, per asso tenir, dones fermansas et mettes dos castels (losquals volgueron mes en lo comtat de Foix), en sa ma, - exceptat lo castel de Foix.
Et apres, a las pregarias de ladita comtessa, lo rey li remettec lo subsidi de la Terra Santa, sino que fos cas que el meteys y agues anar et passar, et, de torn en torn, l'absolvec et abolic.
Estan lo comtat en la ma del rey foc limitat per los seneschals de Tolosa et de Carcassonna, et los terminis designats en lo estrumen, tant cum lodit comtat de Foix se esten, ainsi cum plus a ple avans se expliquara et ausirets declarar.
En l'an mil IIcXCIII, lo comte de Armanhac, contra lo comte de Foix Roger Bernard, loqual avia appelat de trahision, a Gisor, environ la Pentecosta, davant lo rey Phelip de Fransa et los baros, foc constreit a combatre encontra lodit comte de Foix, en camp, sol a sol. Mas, a las pregarias del comte Robert de Artoys, la bestriga et lo discord, lo rey de assi sus lu prenguec et de la batalha que ja avian comensada. Et lo comte de Armanhac, tombat de son cavalh, lo rey fec retraire, et el meteys los traguec del camp et lo dol del camp annulec, no entenden detraire lo dreyt de la un ny del autre en la questio que avian del heritatge de Bearn, ainsy que plus a ple appar en las canonigas de Fransa, et per las lettras que son al castel de Foix sus aquesta matiera.
Et apres lodit an, lodit rey de Fransa et lo comte de Valoys (fen) regidor, gobernador, preceptor Mossen Roger Bernard de touta la terra del dugat de Guyanna, que foc del rey de Anglaterra, sa enrier duc de Guyanna, tant quant se estenden las diocesas de Ax, de Aux et de Ayra et de Bayonna, exceptat las terras et gens del comte de Armanhac et de Vic Fezensac, ab retenia de Vc homes d'armes, donan li tot poder, per los bons servicis que lo comte Roger Bernard li avia feyts tant en la guerra de Gascogna et frontiera de Flandras contra Robert, comte de Flandras, quy era rebele al rey; per que li aguec a far gran guerra.
En l'an MCCCV, lo vieilh rey Phelip, fil del autre rey Phelip, fil del rey Sant Loys, en la villa de Tornay en Picardia, li donec Vc liuras de renda en la vigaria de Malvesi, ab las lettras patentas dadas a Lugdun, lo nove jorn de septembre, l'an MCCCV; et li assignec Malvesi ab la vigaria et ab la seignoria hauta et bassa per tres cens liuras; et, per las doas cens liuras restans, li assignec la seignoria hauta et bassa ab los homenatges. Et apres li donec mil cinq cens liuras, per que li assignec la terra de Gavaret, en lo vescomtat de Gavarda, per cinq cens liuras de renda, lo castel de Roquafort per cens septanta liuras, autre castel de Roquafort en Marsa, Castelnau de Ribera, la terra de Malburgues, los emesses de la terra de Marsa, la Bastida de Sant Genes, lo Mas d'Ayre, lo loc de Miramont, la villa de Gispoy, et la renda de aquels, lo loc de Peyre, lo tout per mil cens doas liuras setze sols tornes; et lo restan li devia assignar en Lengadoc. Lo rey, per sa bona plasensa, vezen la veraya leyaltat et prodomya et volontat que Roger Bernard, comte de Foix, avia feyta en la guerra del dugat de Guyanna et de Flandras, volguec que Gaston, son fil, agues per molher sa cosina seconda Johanna de Artoys, filha del comte Robert de Artoys.
Et apres, lo comte de Foix Roger Bernard aguec gran guerra ab lo rey En Peyre de Aragon; mas foc tractat accord per Mossen Gaston, seignor de Bearn, et foren bons amycs; don lo comte de Foix y aguec gran perdora en sa mort, quand lo rey moric si tost, per so que papa Marti l'avia despausat de son realme, per so que contra sa volentat s'era feyt coronat rey de Secilia, et avia donat la conquesta a Carles, premier fil del rey Phelip de Fransa. Et se devian combatre davant lo rey de Anglaterra a Bordeu; empero Carles y venguec et se presentec devant lo captal, que era loctenen del rey de Anglaterra. Lo rey de Arago no se y mostrec et avia sa sperancia en lo comte de Foix, que li faria sos accords. La assemblada foc assignada a Bordeu lo premier jorn de juin, l'an MIIcLXXXIII.
En l'an MIIcLXXXVI, lo rey Phelip de Fransa assemblec gran ost entorn la festa de Sant Johan Batista, invasic lo realme de Arago et intrec per Rossilho. Et assalin la ciutat de Gerona et la destrusin; lo rey de Aragon moric en un port en batalha, appelat Reffes, et per so lo comte de Foix no li poguec fer sos accords.
Aqueste seignor comte aguec un fil, appelat Gaston, et tres filhas de Madona Margarida de Bearn. Madona Brunisen foc molher de Mossen Elias de Peyragort; Madona Constansa foc molher de Mossen Johan de Levis, seignor de Mirapeys, l'an MIIcXCVI, ab X mil liuras de dot; Madona Johanna foc molher de Mossen Peyre, fil del rey En Jacmes d'Arago, comte de Ampurias et de Ribagorsa.
Mossen Roger Bernard conquestec la ciutat de Pamias en l'an MIIcXCVI, per so que li avian feyta rebelion et l'avian tengut assietat a la gleysa del Mercadal. En l'an MCCXCVI, Pamias foc feyta ciutat. Moric a Tarasco, la vigilia de Nostra Dama de agolost, l'an mil tres cens sieix, et foc comte quaranta cinq ans.