Lo premier comte de Foix (Bernard Ier)
Mossen Bernard foc fil de Mossen Roger, comte de Carcassonna et de Barsalona, et foc marit de dona Beatrix de Bezes, et foc feyt lo premier comte de Foix par la man del comte Ramond de Tolosa et duc de Narbonna, en l'an de Nostre Seignor Diu MLXII; car de per davan era appelat seignor dels Foixens. Et foc tres bon cavalier, valen et ardit, et, en son atge de quaranta ans, foc feyt lo premier comte de Foix.
Et apres, en l'an regnan Nostre Seignor Jesus Christ, so era l'an que l'on contava mil XCV, estan lo premier rey Phelip de Fransa, aquel an se intitulec: regnan Jesus Christ; car, segon las canonigas de Fransa papa Urba venguec en Fransa et escomenguec lo rey Phelip et tout son realme per l'espas de un an, per so que avia laissada sa molher Berta, qu'era filha del comte Baudoyn de Flandras; de laqual dona avia dos fils, et tenia autra fenna appelada Bertrada, comtessa de Angers. Per so foc à lu estramada aquela gracia que nou se mettes en sos titols, ni notaris publicqs nou metessan en las cartas ny estrumens "regnan lo rey Phelip", sinou "regnan Jesus Christ". Et per so ez à saber que aquel an ez lo que se intitulava: regnan Jesus Christ. Et asso ly foc estremat per causa de l'excomenge et, apres tornec ab sa molher Berta et foc absoult et tornec en sa gracia, ainsy cum se troba en las canonigas de Fransa.
Et apres lodit Mossen Bernat, comte de Foix, lo medeys an, donec al martyr Sant Volzia la gleisa de Garano, Cos, Campredou, Cadirac, Ferrieras, la gleisa de Serras, ab sos delmes, et la villa de Sant Johan de Verges ab sos delmes et premissas. Et aqueste Mossen Bernard aguec un fil, appelat Roger, de Madona Beatrix, sa molher.
Aquel an, Godofre de Bouilhon, duc de Loreina, conquestec la Terra Santa de Jerusalem et foc cap et governador de la conquesta; et foren ab luy sos dos frays Ostacy et Baudoyn, et ab els Ancelain de Richemond, Baudouyn, lo comte de Ribamont, Robert, lo comte de Flandras, Esteve, lo comte de Blois, Huc lo Gran, frayre de Phelip, rey de Fransa, lo comte de Vermandoys, Robert, lo duc de Normandia, fray de Guilhem, lo rey d'Anglaterra, lo comte Ramond de Tolosa et de Sant Gely, duc de Narbonna, Bernard, lo comte de Foix, Richemond, lo duc de Pulha, et l'autre son frayre, fil de Robert Guiscard lo Normand, (que) la Pulha et Calabria conquestec, Arpin de Borgas, que aquela ciutat vendec à Phelip, lo rey, per anar outramar ab d'autres valens princes, que tants et merveilloses feits firen en la Terra Santa et prengueren Jerusalem et mantas autras ciutats et reys Sarrazis, que se fen crestias. Et en l'an de Nostre Seignor Diu mil XCIX foc presa la ciutat de Jerusalem, et Godofre de Bouilhon foc elegit rey et regnec un an; et Baudoyn, son fray, regnec apres lu dex hoeit ans en Jerusalem.
Et aqueste bon comte Mossen Bernard moric en la Terra Santa l'an mil XCVI davan la ciutat de Damieta et foc comte trenta dos ans.