Lo quint comte de Foix (Ramond-Roger)
Mossen Ramond Roger foc fil de Mossen Roger Bernard et de Madona Cecila, foc marit de Madona Phelipa et foc feyt comte l'an mil CLXXXVIII, regnan Phelip Auguste, que conquestec Normandia. Et deserec anar en la Santa Terra de Jerusalem contra los Turcs et Sarrazis al secors de Mossen Guy, rey de Jerusalem, et dels Templiers et avesques et menut poble, que eran assietats en Jerusalem par Saladin, soldan de Babilonia et de Damas. Et apres foc presa la ciutat de Jerusalem, leu apres que per Godofre de Bouilhon era estada presa, que avia demorat en poder dels Crestias LXXXIX ans; et foc presa per lo soldan; s'en portec la veraya crox et s'en menec pres lo rey Guy et gran pople crestia. Et per so Mossen Ramond Roger no poguec complir son voyatge et bouna volontat. Et, en l'an mil CXCI, lo rey Henric d'Anglaterra avia convengut ab lo rey Phelip de Fransa de anar secorir la Terra Santa ab lu, et amidos y devian estre. Lo rey Henric s'en passec premier et prenguec Chipre et tout l'emperi; lo rey de Fransa passec apres, jasia que avia attendut lo rey Angles ab sa nobla armada, entre losquals foc Mossen Ramond Roger, comte de Foix, ab autres princes a la companhia del rey de Fransa. Et prengon la ciutat de Acra per forsa d'armas. Et per so que lo rey Henric d'Anglaterra no y era estat, comensec la maluransa et s'en tornec, et lo emperador de Roma lo prenguec et lo tenguec presonnier un an et ne eyxic ab gran finansa. Et d'aqui en fora s'en anec mettre lo seti a Limoges et foc ferit de un cayrel a l'eilh et moric.
Et en l'an mil CCVIII, quinto Idus de Genier, conquestec Mossen Ramon Roger la terra de Donaza per donacio que li foc feyta per lo rey En Peyre d'Arago.
Et en l'an mil CXCIX Mossen Bernard, comte de Comenges, reconeguec a Mossen Ramond Roger que tout so que tenia en Volvestre, homes et fennas, tot ac tenia del comte de Foix et de sa ma et lyn fec homatge et reconeguec que, qui que sia comte de Comenges, deu esse home del comte de Foix per ladita terra de Volvestre, recebuda en lo mes de jul lodit an.
Et en l'an mil CCIX comensec la iretgia a Paris per certans clercs, mestres en teologia, contra la fe, que sustenian que los angels et Diu eran tota una causa. La iretgia foc semenada per lo realme et autras parts, don lo rey fec cremar sieix mestres en teologia, que l'avian comensada. Ab lo coseilh del papa et del rey, commissio foc dada sus lo pays de Lengadoc a sant Guilhem, avesque de Bourges, et a sant Doumenge, que comensec l'ordre dels Predicadors.
Lo comte de Foix conquestec Bezes et Carcassonna et auciguec Mossen Ramon Trenquabeilh, comte de Carcassonna, a la gleisa de Bezes et subjuguec las gens de Bezes et de Carcassonna et las fec venir en camisas davan lu. Et apres, en l'an mil CCX, lo rey et lo papa donen la conquesta contra los iretges al comte Simon de Montfort, cum auzirets plus a pla avan, que tant longamen durec la guerra. Et en l'an mil CCXXII, la feria segonda de Mars, Mossen Pey Roger ab Isarn, son fils, seignor de Mirapeys, redec lo caste de Mirapeys al comte de Foix et ly fec l'homenatge accostumat per lodit castel de Mirapeys. En lo sety del dit castel, lo comte de Foix prenguec la malautia de que moric.
Aqueste seignor Mossen Ramond Roger aguec un fil, Mossen Roger Bernat lo Gran, et una filha appelada Madona Esclarmonda, que foc molher del rey de Malhorca et, ab dot de CL(M) sos de Molgares et maridada per Mossen Roger Bernat lo Gran, son fraire, l'an mil CLXXVII. Lo rey d'Arago al comte de Foix, son dilect nebot, per amor et copulacio de la parentelha, que era entre els, et per los servicis que feyts li avia, li donec et ratifiquec totas aquelas convenensas que, lo rey En Peyre li avia feytas de la donacio del vescomtat de Narbonna, et li autrejec aissy meteys lo pays de Fenolas et Peyra Pertusa et Pertuses, ab condicio que, si moria sens enfans, que tornes al rey d'Arago.
Et Mossen Ramond Roger moric l'an MCCXXIII et foc comte trenta-cinq ans.