Lo septen comte de Foix (Roger IV)
Mossen Roger foc fil de Mossen Roger Bernard lo Gran et de Madona Brunissen de Castelbo et foc marit de Madona Brunissen de Cardonna. Et foc feyt comte l'an MCCXLI et foc noble cavalier et valen et, lo meteys an, fec le pariatge ab l'abbat de Lezat, ab l'abbat del Mas, ab l'abbat de Combalonga et ab l'abbat de Borbona.
En l'an MCCXLVIII, exilec de son pays Mossen Guilhem d'Arnava, cavalier, cum fals et malvat et desobeissen. Et, en l'an MCCXLIX, lo darrier Mossen Ramond, comte de Tolosa, moric en Avigno, venen de Marseilha, per febres, et foc sevelit al monastier de Sant Ebordy ab Madona Johanna, sa mayre, filha del rey de Anglaterra. Et succedec en lo comtat de Tolosa dona Johanna sa filha, que era molher de Mossen Alfonso, frayre del rey Sant Loys. Et, apres morta Madona Johanna, aissy cum lo comte Ramond avia ordenat, tornec (lodit comtat) et succedec a la casa real de Fransa. Laqual dona moric l'an MCCLXX. Et apres Phelip, fil del rey Sant Loys, intrec a Tolosa prendre la possessio l'an MCCLXXI.
Los comtes que son estats a Tolosa, lo premier foc Torsons, et lo premier appelat Ramond foc lo septe, que foc comte l'an MXIII et moric l'an MXXXVII; lo segon Ramond foc comte l'an MLX et foc, ab Godofre de Bouilhon, a la Terra Santa, et lo comte de Foix ab lu, et moric l'an MCI. Lo ters comte Ramond et lo tretze foc comte l'an MCXVI et moric l'an MCXLIIII. Lo quart Ramond et lo quatorze foc comte l'an MCXCIIII et moric l'an MCCXXII et jats a Tolosa, escomenjat, a l'ordre de Sant Johan. Lo quint Ramond et lo quinze es lo dernier comte que dessus ez feyta mencio.
Aqueste Mossen Roger Bernard desera(va) anar a la Santa Terra de Jerusalem contra los Turcs et Sarrasis. Et, en l'an MCCL, lo rey Sant Loys passec la mar ab sa potestat sus los Turcs et Sarrasis; lo comte de Foix y passec ab sas gens. Et prengueren la ciutat de Damieta, et per la permissio de Diu, foren deviuves et s'en torneren arrer los Sarrasis ab gran multitut et infinits de Turcs.
Lo cinquiesme jorn d'avril, lo rey foc pres et redut al soldan de Babilonia ab sos dos frays Alfonso de Poytou, et Carles, comte, que nulh nou escapec sinou lo legat del papa. Et apres los Sarrasis auciguen lo soldan appelat Mabec Escahudin; lo rey finec un gran pres d'aur, et los dits Sarrasis lo se parten, et lor redec Damieta et demorec en la Terra Santa cinq ans.
Apres se levec un poble que l'on appelava los Pastorels, so es en l'an MCCLI, ab lo capitani de Ongria, et fazian crezer a las gens que volian anar al secors de la Terra Santa. Et touts eran layros et murtriers, et quand intravan en las vilas et castels, levavan las espasas et pigassas, que no era res que no los dobtes. Et se entremetian de absolver de touts pecats, de far et deffar los matrimonis et trops altres mals. Et touts los pastors que se podian trobar anavan en lor companha; et quand foren en gran nombre, fasian gran res de mals. Et la regina Blanqua, mayre del rey, mandec que touts fossan morts; et aissi ac firen per tout lo realme de Fransa, que degun no escapec, et comensen a Borges, a Orlenx et a Tolosa.
Aqueste seignor comte moric l'an MCCLV, quitat que foc dels Sarrazis. Et aguec un fil, Mossen Roger Bernard, et foc comte quatorze ans.