Lo ters comte de Foix (Roger II e Roger III)
Mossen Roger, fil de Mossen Roger et de Madona Arsenda, foc lo ters comte de Foix et foc marit de Madona Estifana. Et foc feyt comte de Foix l'an mil CXI, regnan Pascal papa, et Loys, rey de Fransa, et foc seignor de las marcas de la bassa Proensa. Et foc tres valen en armas et tropas causas conquestec en sa vida. Aquel an fec lo pariatge ab l'abbat de Sant Antoni de Pamias, et l'abbat lu donec lo castel de Pamias à lu et als sieus. Et Mossen Roger donec al conven de Sant Antoni, per cascun an, à la festa del glorios sant, mietj muech de net formen, un muech de bon vi et una vacca grassa et quatre porcs ou quatre sols. Et los canonges deven tenir lo castel del soleilh levan entro al soleilh colguat et lo deven rendre al comte de Foix ou à sos comes, liberalamen, cascun an. Et aussy ben Mossen Roger donec al dit conven la villa de Fredelas per los damnatges que sos ancestres, comtes de Foix et de Carcassonna, lor avian donats. Et aussy ben donec à sant Volzia de Foix alcuns cazals, que avia à Cos prop de Foix. Et aguec un fil de Madona Eyssemena, sa segonda molher, appelat Roger Bernard lo Gros.
Et, en l'an mil CXIIII, sant Bernard comensec l'ordre dels Cisteus et, en l'an mil CXXI, un sant homme appelat Robert fondec l'ordre de la cavalaria dels Templiers à Paris, que pueix fen tantas malas obras.
Aquest Mossen Roger moric l'an mil CXLIV, et foc comte XXXIII ans.