lon n taso ala

by jan Pontu

open la, ijo li kama.
pini la, ijo li weka.
insa la, ijo li lon.

ijo ale li kama, li lon, li weka,
li open, li pini.
tan ni la, pilin nasa li kama.

mi pilin e nasa!
mi kute e pilin!
mi alasa sona!
mi weka e kute!
mi lukin e ante!
mi musi tan weka!
mi weka tan pilin!
mi nasa! mi nasa
e pilin, e sona
e musi, e kon,
e suli, e pona
e ale! mi lon!

lape li kama,
li weka e utala insa.

pini lape la, nasa li awen.
taso, nasa li ante.
ale li ante.
kon li tawa e lipu, e palisa kasi.
kalama pona li lon.
suno li open,
taso lete li awen.

jan ale li awen lape.
mi taso li lukin,
li kute, li pilin
e ante wawa.

sona li kama sin tawa mi
pilin li kama kin sama ni:

mi wile lon n taso ala.
mi wile lon a!