Mäned meinela
Pelovepolöl dälü lautel fa Wilhelmine Stifler in Mellrichstadt, Bayän.
Fovicza binom un man vemo pöfik, e meinef stüka lölik pidom omi kanüdiko. Nedon te loegön domi oma al nolön foviko das stadom töbo gudikumo ka un glügamug. Völs biegoms kol balvoto äsif äbinomsöv lifafenik, e gad e yad jinoms etevön al stük nilanik. Konon in topöf lölik das in gad ela Fovicza töbo un dog kanom mufön göbi nen tömetön puti pedibleköl.
In ludom edifalöl at lödom no ba un monälan liegik sod un meinel pöfik e neläbik, kel labedom zu vomi no nejönik e novego stupik. Fovicza stebom du vig lölik in seb, vobom nezediko ab töb oma binom vanlik. Finü vig gekömom domoi nog pöfikumo ka ven beginü vig idexänom in meinöp; bi täno ilabom luüno stoki lifamedas plo vig bal in bodasak oma. Atos no äbinosöv neläb; binos i fät meinelas votik das no vig alik gekömoms pelodöl me divots.
Ye in meinastüks südods sibinoms, kelis it un devel pöfik äs Fovicza no kanom fenesiön. Kopanels oma lasamoms vävelüdelo pozendelo in vinöp seistöl len länasüt al bepükön zidis viga, vagöl bevüpo glätili teldik filavina, e Fovicza nevelo äsenom misalöfi oka so biedäliko äs ven no äbinom fägik al fölön südodi jönik at. Soldels blinoms ome vexadis nog dolikum. Kopanels oma vatükomsok demü zäladel e visitoms glügi in zelaklots, e pozendelo bexänoms tipüni bela Kirnik, kö kanitoms e danüdoms lä toens musiga.
Ye lio Fovicza söitom-la pubön komü mens e in glüg, no labedöl zälaklotädi? Sägo klotäd vädelik oma no labom plu köli pösevik, so liegöfiko sut stonakolatas seistom love om. E i Anicza, jimatel smajönik oma mutof-la läsön bi labof fami binön jidanüdel venudik; ye klot lebalik ofa, liedö! jonom flabilis difikölik plu ka lemänis stofa rigädik.
Tiks somik ätomoms levemo eli Fovicza, semvelüdelo pozendelo, du kamadels oma ämusamoms in vinöp e Anicza ävisitof nilanis valik posbalvoto al lujafön uni lefidi spälnik. Äxamom kulädiko klotastoki oka, kelos no abinos vemo fikulik, bi änedom te loegön kelosi äpolom anu len koap. Plä un czondra, mäned pekofüköl se lanedastof, keli no äkanom gebön du hitatimadels levamik, stöf alik klotemik idepubom sis lonedo.
Finasek meditamas lügik at äbinom das Fovicza ävisitom teladeli paga e äsagom ome me ton suädöl: “Zsupun” (tiädi at rumänans geboms plo pösods et kelis no viloms nemön “söl”) “logol das klots oba binoms dislitik. Givolös obe uni klotädi pötik. No kostom ole moni mödik, e binom benod plo ob.” Teladel päsüpitom dub beg at in mod no vemo lesumik. Ye sükü südods patik loma no äkinom denesiön foviko beki ela Fovicza; sikod äxamom stoki lotädas okik, äsevalom en diledis anik nedelidikum, e älovegivom omis ele Fovicza. At ävokom vemo pemufälo: “No sagob, God mesedomös oli! bi ven seb oba ovedom böfüdik, opelob ole givoti at liegöfiko sa fiens e fienafiens.”
“Fale gale, götöp vagik,” popef stüka lölik änemom sebi ela Fovicza. Ven ilogon das Fovicza äitöbom vanliko al sepön se dib tala kelosi änedom al lifamod pülik oma, un fasedel idatikom bemalami at, kel suno päsevom vätopo bi äpötom lebeno ä sebe ä lönele.
Ye seb somik ailabom vimis, e un del äkömom ven süpito lieg oma ämekom stunön topöfi lölik. Semdelo Fovicza ädatüvom golüveini kel äsädämom omi liegÖfiko plo töb jünuik oma.
E nu lif nulik äbeginom. Fovicza äjuitom livüpi du vig lafik; jimtatel oma päklotof me satin e velin e ludom vönik no äpötom plu desidames cädikum omas. Ämekoms bumön uni gledomi. Ven at päfinom, äbinom bumot selednik, mag fiedik selednöfas kalada rumänik e pato kalada meinela. Bifü leyan ästanom kluzif gianik pelupänöl bludaköliko. Panel ägevom fäne oka libi nepemiedöl e se bib ä se lusags loma ävälom yegis oma, cenöl ma plüd. Nebü Dalival pekluziföl lapinel Hora, säfugöl se fanüb oma; fovo lelanel Michael, funöl dlaki hölik me yagagün e fino lutikäl sebas, sovöl golüdi ini seb “Fale gale”.
In yad senit visitelas pälenzugom balüdo fa un mül kel pämofom dub un bluk smalik e änokom e äbösetom du del e neit äsif ävilomöv güvön zögamis valik kelis stums e pliem lemänik äfedeboms danü nedut ela Fovicza. Te cems tel gledoma pälödoms; lemäniks valik ädunoms as magadöp plo divots valnik kelis Fovicza e jimatel oma äkonletoms. Musoföp milagnik at äninom musigaglokis lul, kelis Fovicza älöfom mekön pledön leigüpo al gälodam lotas oma; fovo püpis jonöl logimis e mufamis drolik, stonemi e münis seledik, demagis ela Fovicza e ela Anicza, leülapänots fa nam lekanik pagapänela.
Beginü vig in Abrudbanya binom nomomafiko malütadel, e Fovicza äbinom aivistel ota, ifi no älabom jäfis sembal us it. Gluplisip netakonömava, konsefam leigoväta bevü segivs e ninsums ätefodom omi lenemödo, sod ävisitom posbalvoto vinöpis valik kö ädalom spelön dlefön pesevanis sembal. E if dlinacöm ävedom ome tu nabik, ägolom ko leköpakopanels ve buigs kekaselelas, kö lemon filavini svidik pemigöl me miel. Musam äidulom jü zeneit, kelüp Anicza äimonedof al lomad, e it Fovicza äsuemom das nu äjuitom plu ka saido (säto) dinis gudik.
Natiko du del suköl Fovicza no äkanom golön al seb, bi täno malad semik änilom, kel pasevom i fa popef lenlönöl kulivastepe geilikum, e panemom “katayamip.” Sanam ota jenom in bids difik; Fovicza löfom kälami patik, o. b. gläts anik filavina.
Sosus Fovicza äjuitom divotis so nepespelo e süpito pegetöl, kud balid oma äbinom pelön teladeli. Leigüpo äkömädom uni magüfaklotädi so kostik äs in topöf at no log menik evelo ädalogom uni sümiki. Päkofükom se klöf vietik feinikün; lefadem äkosietom se golüdalefads e Fovicza äpelom plo ot legälo dukabis baltum luls. Klots bäledik päladyuloms, bi Fovicza no ävilom konsefön mebi misalöfa jünuik oma. “Jedob oli seo da litöp, o pöf,” ävokom in pükönamod magaliegik e dölodik et, kel kaladom rumänani, e ädunom äs isagom. Klots bäledik äflitoms seo su süt. Fino ked ädlefom eli czondra flabipetegöl. Ye jimatel oma, Anicza smajönik äpidof bölüdi mäneda, sikod ägolof klänöfo seo in süt, äsuitovf kloti, so nestümiko pemojedöl, se püf e nen sagön matele ofa vödili bal en, äsävof omi in dib komfeda ofa. “Kim nolom kelosi füd oblinom!” ämeditof.
I sak fulikün vedom vagik. Vol lölik nolom atosi; te klad bal menada sibinom kelenom at binom nepesevik, at binom - els finanals.
In seb ela Fovicza un pün äsibonom, kö golüd äzedom pubön. Süpito vein liegik äneflumom e denu stonem sudik äkömom in plad ota. Fovicza ästörom ziliko in rolem (? Red), Äblüfom in mods valik gevokön läbi, ye nen sek. “Götöp vagik” denu äblöfom oki leo digik nema oka. Labem pekonletöl älunom levemo vifiko sukü def lüfluma; bi blüfs vanlik, mekön sebidenu befüdik, äfeslugoms moni mödik. Suno un dil felas pelemöl ämutom paselön, täno lemän täno gad e fino dom it. Musigagloks pädeditoms lätiküno; pälenlofoms te ven ya vafs kostik, klots magifik, demags glolik e möbs jönik piseloms al suäm smilniko pülöfik.
Fovicza nu ästadom vemo badiko, nog mödo badikumo ka in tim et ven “Fale gale” idagetom voaki badik oka. Nek ävilom lugivön ome bosi; klots älagoms in luklöfs len koap oma, e Anicza smajönik ibölüdof sukü def e daleb jöni ofa ünü muls anik. Nifatim gladik äkömom; jek mena pöfik, e Anicza, kel äyelo äbüadof dö dünels tel, nu ätevof al fot al konletön tuigis sigik, dat luüno du vendel un fil pülik vamomöv ludomi. E Fovicza äpötütom e äflodom e älublamom oki it uni fopi misalöfik, bi timü bundan no ispälom luüno uni czondra nulik.
In timil ot yan pämanifom e Anicza änütlidof. Logot ofa änidom löliko demü kalod e gäl; älukiblinof eli czondra bäledik e äpükof: “Binos vemo kalodik seo, e mäned bäledik at ovamom oli lebeno ven ogolol al vob in seb.”
“O läb kimik timü neläb un vom plokudik binof!” Fovicza ätikom e ätuülom mänedi bäledik zi koap oma. Täno ädexänom in seb e äbeginom delavobädi oma.
NOETS.
- ↑ Lautel koneda at binom nu tedadünal Nugäna, klatal Béla Lukács.
Se Kosmopolan 1893, Nüm: 12, Pads: 147-149.