Mıletê ke zıwanê xo kerd vındi, her çi yê xo keno vındi

Miletê ke ziwanê xo kerd vîndî, her çîyê xo keno vîndî”. Gelo na vatena raşte ra dime se vacîme? Vatenêda zaf raşt a û seba roja man a ewroyêne ama vatene. Coka ez vana: ziwan kayê verê destanê şima nîyo!

Ziwan zaf hesas û zaf kî nazik o. Tela ziwanî telêda zaf barî ya. Na tela ziwanî ke visîye, êdî gire piro nêdîno. Gire ke gina piro kî, o girewo kor kî, yanî beno.

Her kes bîyo alimê ziwanî, bawo. Her kes bîyo zanitoxê ziwanî. Bitaybetî sosyalmedya de ziwanê ma kirmanckî ser ro zaf kayî yenê kaykerdene. Her kesî kar û gureyê xo caverdo û bîla ziwanê ma kirmanckî kewto. Naye her kes rind û hem kî zaf rind bizano ke karê ziwanî karê îlm û bîlîmî yo.

Kar û gureyê ziwanî karê ma nîyo. Ma dest ra çi kar yeno, ma ê karî ser o vinderîme. Nusnayene û wendene çîyêde bîn o, la ziwanî ser o xebate kî çîyêde bîn o. Ziwanî ser o xebitîyayîş karê ziwannasan o, karê îlm û bîlîmî yo. Karê dezgeh û komelan o, karêde zaf muhîm û zaf kî hesas o.

Ziwan zanitene, henî çîyêde rehet nîyo. Gere mordem ziwan û gramerê ziwanî, çekuyan rind bizano û rind kî hakîmê ziwanî bo. Çekuye ser o bidîqet vindero, koka çekuye ser o vindero û çekuye kotî ra ama, se ama? Bingeyê çekuye zaf muhîm o.

Nê kesê ke sosyalmedya de ziwanê ma nîya tar û wêran kenê, gere tar û wêran kerdene ra raver alfabeya ziwanê ma kirmanckî rind bimusê. Bingeyê ziwanî alfabe ya. Alfabe ra dime raştnuştîş û telefuzê çekuyan o, raştnuştişê herfanê kirmanckî yo.

La çi heyf ke kes nê xusûsanê ziwanî nêcêno diqet. Hema danê piro û şonê. Ziwanê ma kirmanckî kerdo kayê doman û zê kayê domanan ser o kay kenê. Raştî kî zereyê mi ra gonî şona. Zereyê mi ra kirmanckî dilope bi dilope palakîno. Zereyê mi seba bêkesîya ziwanê ma kirmanckî hurdî-hurdî berbeno. Kezeba mi seba bêkesîya ziwanê ma kirmanckî bena lete-lete, bena hurdî-hurdî.

Ziwanê ma ziwanê Xizirî yo. Şima bi nameyê Xizirê Kalî kenê ke bi zanitene, bi hîsanê xo yê Kirmancîye, bi rindîye, bi raşt nusnayene, bi raşt wendene, bi can û royê kirmanckî ziwanê xo kirmanckî rê wayîr vejîyê.

Seke amo vatene “miletê ke zonê xo kerd vîndî, her çîyê xo keno vîndî.” Na mana de ziwanê xo rê, kulturê xo rê, kamîya xo rê, welatê xo rê, qomê xo rê bi hîsanê xo yê mîlî wayîr vejîyêne.