mama sewi pi unpa ala/sitelen Lasina

by jan Lakuse

mi pi unpa ala li
kama mama tan seme a?
tenpo sike suno luka weka
la sewi li kama toki:

“jan anpa lili pona o
toki pona sina li wawa.
kulupu la sina pana sona
tawa jan mute la suwi!
mi wile pana pona esun.
sijelo sina li kasi la
mi pana e kili suwi.
kili li kama suli mute
la ale pi kulupu pona
li ken moku e ona.”

sewi li tawa e luka
la pilin nasa li sijelo.
insa ko li tawa sike.
pana kon li kama ike.
lipu mute li selo tu
li kama wan lon mi.
insa la mi kute e
tawa pilin pi jan lili.

tawa sewi la mi toki
“mi anpa tawa wawa sina
taso o toki tawa mi:
seme la mi o mama?
sina wile esun pona la
o pana e mama ala!
mi wile e mani mute
e weka pi nasin ike.
kin la wile sona ante:
nasin ni pi nimi kili
li pona ala pona sewi?
tawa mi la nasa nimi.”

taso sewi li toki ante.
“jan lili li kama la
ona o kama toki pona.
toki ma en toki ante
o lon ala kute ona.
toki pona taso li sewi.
o sona e wile mi.”
la sewi li kama pipi
li kama lon weka mi.

tenpo toki li weka la
mi open lon supa lape
la mi pilin e ni:
mi lukin pi lape taso.
taso insa mi suli sike
li tomo pi jan sin.

ma Mewika la
ken weka pi jan sin
li lon ala tan seme?
kulupu lili wawa mani li
wile anpa e wan kulupu
li pali nasa ike lawa.
tenpo suli la ken weka
li tawa jan ale ma.
tenpo ni la lon ala.

pakala la mi sona ala
weka e jan sin insa.
taso mi pilin ike a
tawa pali mama sewi la
mi toki ni tawa mi:
“mi wile ala kama pana
e nasin pi toki pona
tawa jan sin sewi ni
la mi ken utala seme?”

mi awen tawa kama jan
la mi toki pona ala.
kepeken tenpo lili a la
mi toki Losupan
mi kama sona mute e
nimi pali e nasin toki
e nimi pi ante pilin
e nimi pi poka pali
e nimi mu e kalama.
toki Losupan la
mi kama wawa nanpa wan!

mi pana e jan lili
tan insa kepeken wawa mute.
mi jo luka e jan
la mi lukin e ona.
ona li suwi sama kili.
mi pilin suwi e olin.
nasin la mi toki kepeken
toki Losupan taso.

mi en jan lili mi
li poka la pilin pona.
tenpo sike wan li pini
la jan lili suwi mi
li toki nanpa wan pi
kalama suli kepeken toki pona:
“mu! mi jan lili sewi!”

ni li nasa mute la
ale kulupu li kama sona
li pana mani tawa mi.
taso toki ante ale la
jan lili li sona ala.
nasa la toki pona taso
li ken lon pilin ona.