Maria del cender
Maria del cender
L'era un om e na fémena che i aea na tousa, che aea a inom Maria e aea per nona la Madona. Chista fémena é morta e chel om l se à ndò maridà. Le vegn a aver trei touse. Chista pera Maria la era trata vin de dò. Pech regolada, che no la podea nience jir a messa grana. E le autre fornide, le jia semper a messa grana. Maria cognea ntant tizar sot l'orc.
Le vegn le feste de Pentecoste de Mé e la à cognù star a ciasa. Ntant messa grana la se à metù a pianjer, che la era arbandonada. E l'é vegnù so nona. L'à domanà che che l'à. Ela l'a dit:
"Vedede ben nona, mie sor le é a messa e gio cogne star a ciasa."
E la nona l'à dit: "Te Maria, sta bela viesta e va a messa e più da vejin da tie sor e miec l'é."
E Maria la é jita e la se à metù apede sie sor. Ele no l'à più cognosciuda con chela bela viesta. E Maria perché so nona ge aea dit che a l'ùltim vangele la se n vae sobito, la se n é jita a tizar sot l'orc e so nona é se n jita. Le é vegnude da messa e le à dit: "O Marieta chega a cender, n cender te on lascià e n cender te on troà. Noi aon po vedù na bela segnora te messa." E Maria: "Se fosse po stata gio. - Che aeste dit? - Che che che é dit: Voscia bocia val n schit." Ndoman le é ndò jite a messa, e l'autra a tizar sot a l'orc. E l'é ndò vegnù so nona. E la ge à portà amò na più bela viesta. "E vàtene da vejin da tie sor, più davejin tu rue, più miec l'é. E canche l'é l'ùltim vangele, fa desche ngern. Veitene a ciasa coran." E la é vegnuda da messa e cet.
L terz dì le é ndò jite e Maria tizaa sot a l'orc. L'é vegnù so nona la ge à portà amò na più bela viesta e la ge à dat n anel de or e l'à dit: "Da l'ùltim vangele tirelo su per gejia e varda chi che l coi sù."
E l'é ruà te n stival de n segnor. Chist segnor l'à coet sù l'anel e l'à vardà chi che l'à tirà. E l'à vedù se n jir fora de lejia sta bela segnora e l'é jit a veder olà che la va, e l'à vedù che la se n va te chista majon.
E le sor le é vegnude da messa et cetera. Ntant che i marenaa l'é ruà l pare de chist segnor col fi e l ge à dit: "Voi aede na bela tousa che ge piasc a mi fi."
E nlauta la maerigna de Maria l'à dit a la più veia che la se vestesce bela e la se lasce veder. Canche l'é vegnuda l signor l'à dit: "No l'é chista. No l'é chista."
Se à vestì la seconda e l'é stat l'istesc. Se à vestì la terza e l'é stat l medemo. Dapò la maerigna l'à dit: "No n'aon de autre, auter che na burta te cender che tiza sot l'orc."
E l segnor: "Lasciamela veder." E Maria se à vestì co la più bela viesta de sia nona e l segnor l'à dit: "L'é chista".
E tous l se l'à touta e l se l'à maridada.