Mascarado d'un Orb é de sa Guido, per uno descripciu de Beutat
Mascarado d'un Orb é de sa Guido, per uno descripciu de Beutat
Peyre l'orb é Guilhém la guido,
Drolles é de fort janti bido,
Partiguen un jour de l'autr'an
Del boun Païs de Carmantram,
Per à plaze beze las minos
De las Toustounetos Moundinos,
É sabe se lour perfecciu
Junto dan la reputaciu.
Péyre, qu'es aci que m'escouto,
É que quand drom nou s'y bey gouto,
Agrado tout, é trobo bél
Tout ço que passo per mon él.
Filhetos dounc, cal qu'yeu retire
L'or que diu remounta mon dire,
Placio bous nou refusa pas
De me descurbi bostre cas.
Yeu parli de milo partidos
Que bous randen tant accoumplidos,
Que touts, percanto de beutat,
Bous dounon le prumié bantat.
A part, capetos, garo, garo
Qu'yeu bejo se re per encaro.
Couratge, un froun se descubris
Doun la perfecciu me rabis,
Relebat, é semblo que digo:
Aci la Naturo proudigo
Semenéc may de milo frans
De liris esplandits é blans:
Al cubért d'uno tresso primo,
Que le Soulel mémos estimo,
É fa gran cancan que soun pel
Sio loung é tout d'or coum'aquel:
Aqui de sas mas mistoufletos
La Reyno de las Amouretos
Fa cent inbisibles sedous
D'aquel pel frisoutat é dous,
Oun qui s'arresto d'un eilhado
Y bey son armo rambulhado:
Des sedous que l'on nou bey pas
Dous ne toumbon un pauc pu bas
Dret le trauquet de las aureillos,
Teugnos é bélos à merbeillos,
Afi que dins soun bél esprit
Re nou leguene de mal dit,
O per fa que dedins la cloto
Cap de piuze ni babaroto
N'intre, dan cambados é saus,
Pana le sucre del repaus.
Un'autro causo pla poulido:
Moun él é ma paraulo crido,
De qui se parlo que le Cél
Nou féc jamay re de plus bél;
Aco soun dos gautos sourretos,
Poutounetos é bermeilletos.
Tabe quand l'ale d'el Printens
Ben eysuga les prats goutens
É cassa le tor é la bizo
D'aquelo gauteto ta lizo,
Pren é malébo las coulous,
Per mirgailla toutos las flous.
Més tenéts coussi se presento
De dous éls la clartat rousento,
Els, que dins un cor amourous
Alucon milo fougairous,
É que dejouts un arquet blounde
Nou fan que capigna le Mounde.
Aro, per moustra dous soulels,
Alandon toutis les perpels:
Aro d'uno finto murtriéro
Guignon com'uno dignadiéro,
Aco's le loc oun may que may
Le petit Diu puntié se play,
Sounque quand ba fa la tantaro
Sul pu bel moble de la caro;
Aco's aquel nas coutinaut,
Ses qui l'Amour serio quinaut;
Car sus el le Droullet se carro,
É d'aqui doussomen dessarro
L'arc d'an que baillo sul bequi
De qui que passo per aqui,
É se degus le persecuto,
Dins las nazics se met à futo.
Dous pots d'oun le tint natural
Mato le pu rouge coural,
Tenen ma bisto ta pipado,
Qu'yeu pensi qu'uno girouflado,
En fugin la ma des Pastous,
A pourtat aqui dous broutous
D'uno couloureto bermeillo.
Ay, hé birats aquel'abeillo,
Que, sampa néssio coumo jou
Pensao bese qualque flou.
Tourno-t'en à toun buc, petito;
Ton mél n'a poun aci de dito
Car soun discours sabent é bél
Es pu dous que sucre ny mél.
Be las besi be la dentetos,
Que paressen en dos renguetos,
Doun maladan ny mal de cap
Nou n'a jamay tirado cap,
É teni per causo seguro
Que se la sabento Naturo
Bouillo fa de sas propros mas
Uno milgrano doun les gras
Fouresson de pérlos causidos,
Que d'aquelos dens ta poulidos,
É des petits cayssals unencs
Fourmario les plus bélis rencs.
Hurous à qui talos dentetos
Mourdran le nas per amouretos !
Car entretan sous pots contens
Chucaran milo passorens,
É nou sera pas qu'el nou bayse
Le mentounet tout à soun ayse,
De qui le cap bél é gentil
Escarnis un petit troumpil,
É clabo les tréts del bisatge,
La besiaduro de nostr'atge.
Daqui jou fauc un redoulet
Per prene le col al coulet,
É diré del per rastelado
Qu'aco's un pila de caulado,
Que le petit Diu féc coufi
Damb'un panet de sucre fi,
Dount aros el bol prene exemple
Per fa de clastros à soun Temple.
Un petit courdou de blu clar
Tout escasso penos y par,
Aco's uno petito beno
Que ta doussomen s'y permeno
É tant fa de tréts à l'entour,
Qu'on y bey cent chifros d'Amour.
Ay, ay, Peyre, ten me la capo,
Qu'yeu tengo l'armo que m'escapo,
É que coumo l'aurél al besc,
Se pren sur aquel burre fresc,
Que per nous fa milo embejetos,
Se despartis en dos bouletos.
Aco's un nizal de beutats,
Un esperenc de libertats,
Aco's le gauch d'uno armo tristo,
É le bouignou de nostro bisto.
Aqui coumo sur moun tresor,
Yeu é toutjoun l'él ô le cor.
Doublo poumeto miéy maduro,
Per tu me play de fa gatjuro
Qu'aquel que te beyra puléu
Per de carbou prendra la néu:
Tabe te tenes en parado
Per éstre toutjon desirado;
Més qui n'es countent coum'un Rey
De beze coumo l'on y bey
Le pouls d'uno talpo que bufo
É la fayssou d'uno baudufo
Salbilome que per clabél
Es plantat un petit poupél.
Hola, mutus, yeu passi l'osco,
Me pouyrion bailla su la closco
De boule dire moun abist
De ço qu'encaro n'é pas bist,
É que né poun fiso de bese,
Se qualqu'uno de may de lese
Nou me ben tira pel rebéc,
Per me moustra tout béc à béc.
Atal sense may de disputo
Pleguen la fardo plus eyssuto,
É fasén à noun-ana léu,
Perço que bous fachan beléu.
Douncos, ô bélos Moundinetos,
Or, Soulels, Pérlos é Flouretos,
Agradats qu'un bon Coumpagnou
Parle toutjoun à bostr'aunou,
É que bragardomen sustengo,
A bél tail d'esprit é de lengo,
Qu'en bous demoron néyt é jour
La Beutat, la Gracio é l'Amour.