Medegh sinzer
Domenegh Balestree (1714-1780)
Medegh sinzer
In di viset ch'el fava
ai gran sciori on dottor de medesina,
de consuett l'andava
a brascià sù in cusina
coeugh, sottcoeugh, ajutant,
per essegh obbligaa tant e poeù tant:
"Vuj olter, el diseva,
sii ciamaa el ver ajutt,
el sostegn de la nostra profession!
Seguitee pur inanz
a fa i solet pitanz
casciandegh sugh, drogh, speziarij per tutt,
se nò stemm fresch nun medegh,
e in stat de fass raccomandà in di predegh!"