Mió madre

by José García Pelaez

Dicen que de la madre
Los besos son de miel...
¡ Ay Dios, yo dé la mía
Unu 'n xamás prebé !
Cunten que la mirada
D' una madre non tien
Comparanza nel mundo
Co les d' utra muyer.
¡ Triste de mín, que nunca
Sos güegos atopé
Mirándose nos míos
Dende que pudi ver !
Cunten que les palabres
Que diz alguna vez
Al so fiyín qu' añera
Abrigadín en sen
Son tonadines d' ánxeles
Benditos, q' á mió ver,
Y canten dende 'l cielo
Pa fela tochecer;
So voz ye toquín d' arpa
Que sona muncho bien,
Y so aliendu queridu,
Arume de clavel.
¡ Ay de mín, madre tienra,
Que nunca pudi oyer
El dexe regaladu
De to voz, ni una vez
To aliendu cariñosu
Cayó so la mi' axen !
Pedi-i á Dios un día
Que me dexara ver
To cara amorosiega
¿ Cumpliómiloi ? -Non sé-
Una noche 'n q' apenes
Pudíme adurmecer,
Na que por tí lloraba,
Na que por tí recé,
En isa estraña hora
En que 'l alma entristez
Como entristez el cielo
Dempués d' atapecer,
Per xunta la mió cama
Pa cerque de los pies
Vego una sombra erguise,
Y que s' acerca... y crez...
Y esclarezse... y atrópase...
Y faise una muyer
Fermosa como 'l alba
Que 'n cielo resplandez...
¿ Yeres tú, tienra madre,
Yeres tú ? -Non lo sé-.
Miróme con dolzura,
Miréla yo tamién
Col alma rebosando
De dicha y de placer...
Yera morena, yera
Pergraciosa á la vez,
Serenina y homilde,
Tan dolce q' al mover
Los llabios repicaos
Falando non se qué,
Que non ascuché entóncenes
Nin ñunca golví oyer,
Sentí tal gusto 'n alma
Farta de penes, que
Quixés morrer, de veres
Finame allí quixés
Por non golver del mundo
A saborgar más fiel.
¿ Yeres tú, dolce madre,
Yeres tú ? -Non lo sé.-
Pa mín tendió los brazos
Les manes llevanté,
Collóme y dióme besos
Tan dolces como miel;
Miróme como nunca
Mirárame muyer;
So voz sonó 'n mió alma;
So aliendu na mi' axen
Dexó com un aflundiu
D' arume de clavel,
Y escontra´ l tienru pechu
Apertándome bien
Díxomi:
-Ya que viva,
Fíyín, non t' abracé
Quiero abrazate muerta;
¡ Ven, fíu del alma, ven ! –
¿ Yeres tú, dolce madre,
Yeres tú ? -Non lo sé.-
 ¡ Ay de min ! ¿ Qué más preba,
Qué más razón se quier ?...
Pero un suañu, una sombra,
Una visión ¡ que ye
Pa quitar á un la pena
Que 'l alma i entristez !...
Ven tú del cielo ¡ madre !
Y dímelo si quiés;
Y si yeres aquella
Abrázame utra vez,
Y si non yeres déxame
Cabo de ti morrer
Bebiéndoti tos besos
Tan dolces como miel,
¡ Ay de mín ! ya que 'n vida
Nenguno ti prebé !