Mob volapükelas netas valik
Eblöfon ya das volapük binom pük teda e nola plo fetans beünetik; zeil gudikün oma obinom kludo ut kel okömom de balad japälik e sapik slopas at tel. Lenlogöl sikodo volapüki disü selogam at geilik kanobs kludön das omütom pianiko vedön med kel oblodom menis valik dunöl sevön balvoto popis valik tala tefü kösöms, teds, pälams, studs e kans omsik. Ven orivon atosi volapük odagetom zeili gletik oma; ab, nen citön obis, tim et binon nog fagik e mütobs anu steifön üno al nilön obis füdete at magifik.
Step balid al atos pomekom ven net alik obepenom oki it tefü lif lölik oka in lönugs patikün e diseinü atos al beginön vobi at laltügs anik popüboms in bled at dö Täl. Dü osteifobs dunön läni obsik pasevöl valikes, obinobs daniks utes netas votik, kels, posdunöl sami obas, oyufoms obis in beginam at fikulik.
Oplöpobs also sevön obis balvoto e duinam keli volapük odunom menade valik polesevom suno fa valiks. Otüpo laltügs somik dü oblünoms yegi nitedikün plo dil literatik bledas volapükik otidoms evelo e okanoms rigön literati jenik e velatik volapüka.
Se Volapükabled Tälik 1888, Nüm: 1, Pad: 5.