sewi li pimeja. kon li len e ale. telo lete li kama tan sewi, li tawa anpa. jan li tawa lon nasin. len ona li jo e telo lete mute. ona li wile lape, taso ona li awen tawa. ona li kute e ni: soweli tu li tawa, sike mute li tawa sike… jan li lukin tawa monsi, li lukin e soweli tu e tomo tawa.
mu li kama tan insa pi tomo tawa: “jan Wiko o! jan li lon poka nasin, o pini e tawa!” jan Wiko li tawa e linja soweli, la soweli li pini e tawa. jan lon insa pi tomo tawa li open e lupa pi tomo tawa. len ona li pimeja li pona li suli. ona li toki e ni: “sina pali e seme lon tenpo ni? sewi li pana e telo lete mute.”
jan lon nasin li toki e ni: “mi tawa tomo mi.”
jan lon insa pi tomo tawa li toki e ni: “nasin li ken pakala e sina! jan ale lon ma tomo li toki e ni: jan monsuta li lon, li moku e telo loje pi jan ante! sina o kama lon insa pi tomo tawa mi, ni la sina ken tawa tomo sina, li ken lape pona.”
“sina wile e mani seme?”
“mi wile ala e mani! o kama!” jan lon nasin li tawa tomo tawa, li kama lon insa pi tomo tawa. lupa li kama pini.
jan pi len pona pimeja suli li toki e ni: “nimi sina li seme?”
jan pi len telo li toki e ni: “mi jan Ani.”
“a nimi sina li suwi tawa mi! mi jan Luki. tomo sina li lon seme?”
jan Ani li toki e ni: “lon pini pi nasin ni.”
jan Luki li toki e ni: “nnn… sina wile ala wile e ni: tenpo pimeja ni la, sina lape lon tomo mi? tomo mi li lon nasin ni.”
“n, mi wile.”
jan Luki li toki wawa tawa jan Wiko: “jan Wiko o! o tawa tomo mi!” jan Wiko li tawa e linja soweli la, soweli li tawa sin. kin la, jan Luki li toki e ni: “sina lete anu seme?”
“lete lili”
“o jo e len seli mi.” jan Luki li pana e len tawa jan Ani.
jan Ani li toki e ni: “sina pona.” taso jan Ani li sona ala e ni: jan Luki li pali e ni ale tan seme? ona li wile e seme tan jan Ani?
ona tu li toki ala lon tenpo suli, li kute taso e kalama sike e kalama soweli.
tawa li kama pini. jan Wiko li toki wawa e ni: “mi lon tomo sina!” jan Luki li open e lupa. jan Ani en jan Luki li kama tan tomo tawa. jan Luki li toki e ni tawa jan Wiko: “mi tawa, sina pona!”
jan Wiko li toki e ni: “tawa pona a!” jan Wiko en tomo tawa ona li tawa weka.
jan Ani li lukin e tomo pi jan Luki. ona li suli a! jan Luki li lawa e jan Ani tawa lupa tomo. ona li toki e ni: “mi tu o lape, tenpo kama la mi ken tawa sin. sina wile lape mute anu seme?”
jan Ani li toki e ni: “mi wile e lape lili taso.”
“a, mi en sina li tawa tomo lape sina.”
ona tu li kama lon tomo lape. ona li jo e supa lape, e poki mute, e sitelen kule, e ilo jasima. jan Luki li toki e ni: “o lape pona, tenpo suno la mi pini e lape sina. ni li pona ala pona tawa sina?”
jan Ani li toki e ni: “pona. o lape pona.”
jan Luki li pini e lupa. jan Ani li kama lon supa lape. tomo ni li suli a tawa ona… tomo ona li lili taso. tomo ona li jo ala e poki mute, e sitelen kule suli… jan Ani li pilin pona, taso ona li pilin nasa lili kin. jan Luki li pali e ni ale tan seme a?
mun suli li lon lupa lukin. mun li suwi tawa jan Ani. suno li seli mute e ona. supa lape ni li pona kin. ona li kama lape.
sewi li pimeja. kon li len e ale. telo en wawa suno li kama tan sewi. jan Ani li lape pona. jan Luki li kama tawa tomo lape ona. lupa li kama open, jan Luki li kama lon insa. wawa suno li suno e ale, li kalama suli wawa a, li pini e lape pi jan Ani!
jan Ani li toki lili e ni: “tenpo suno li lon ala, sina kama tan seme?”
jan Luki li toki ala. ona li lukin taso e jan Ani. taso, jan Ani li pilin monsuta ala. ona li kama lon noka ona. ona li lukin e tomo… e ilo jasima! jan Luki li jo ala e jasima lon ilo jasima!!!
jan Ani li toki e ni: “sina monsuta, li moku e telo loje!!”
jan Luki li toki e ni: “lon!” pilin pona li kama lon sinpin ona! jan Ani li lukin e uta pi jan Luki, ona li jo e kiwen uta suli tu tu! jan Luki li tawa wawa suli tawa jan Ani, li wile moku e telo loje ona a! kiwen uta suli tu tu li kama lon insa selo pi jan Ani, jan Ani li pilin ike mute! taso, jan Luki li toki e ni: “nn, ni li telo loje nasa a! ni li tan seme?!”
jan Ani li luka wawa e jan Luki. jan Ani li toki e ni “sina nasa a! o lukin e uta mi!”, ona li open e uta ona. kiwen uta suli tu tu li lon uta pi jan Ani kin!
jan Luki li toki e ni: “seme?! jan tu pi moku telo loje li lon ma ni??”
jan Ani li toki e ni: “lukin mi la, ni li lon.”
jan Luki li pilin nasa li pilin musi. ona li toki e ni: “a a a, mi pakala! taso, mi awen wile e telo loje, sina pilin sama anu seme?”
jan Ani li toki e ni: “mi pilin sama. tenpo pini la, mi wile moku e telo loje sina.”
“pona! sewi li awen pimeja, la mi tu o alasa e telo loje!”
ni la, sewi li pimeja. kon li len e ale. jan pona sin tu li alasa e telo loje.
