Musigabok bäldik

In cem obik musigabok
stanon in gul nilo lä lok;
stanon us ya sis yels mödik
ya sis dels cilüpa obik.
Ag! äjäfob so vilöfo
me on as cil, e frediko
ädanüdob in cem smalik
ko mot - ag! in cilüp läbik.
Ätakädon fe ün hitüp
boso, ye dü fluküp, nifüp
bo äpläyon dü yels mödik
lidis, lidis neglömovik.
Cilüp jönik enepubon,
ko mot i läb emoikon.
Musigabok us ön seil
drimon dö mot, drimon dö cil.
Mot takädof dis krod e ston
cil sis lunüp edaülon,
ye tim jönik reton in mem
nog dub musigabok in cem.

Se Volapükagased (Zänagased pro Volapükanef) 1959, Nüm: 1, Pad: 4.