N giust lament dal musciat de Salin
N giust lament dal musciat de Salin, contra chi da Vich e no chi da Mazin
1.
Tu da le musce e di musciac; o Dio!
Senti ades n giust lamento mio,
Che da la tera su te mana en aut
L musciat de Salin e no de Sbaut.
2.
L'é chel pere veie musciat de Salin
Da Pera en Fascia e no trentin,
L conta trentaot egn e più,
Lo pel dir ogneun che l'à vedù.
3.
L viver de n musciat l'é ben rie,
Perché un se n dura da ciaf a pie;
E dassen per dir a ogneun la verità
Chele vite, che gio nesciugn se l'à durà.
4.
Ma fam e colpes e bastonade
Forade, gofes e legnade
N'é ciapà gio giusta teis,
Ogni dì e no soul ogni meis.
5.
Mo dut chest, no me fajea nia
Perché la not era semper mia;
I me dajea ben, ben da magnar
E duta la not podee pussar.
6.
Mo ai undesc de chest meis
Me n'é durà giusta teis;
Da la una o da le doi de not
Sente n sciusciur desche n teremot.
7.
Me pissae, o Dio! l'é certo Salin,
Che à ressolt de jir a vin,
L'é certo chel maladet mat,
Che vegn a tor ades l so musciat.
8.
Mo no, son content, la é falada,
L sciusciur l'era via te strada;
M'é pissà taji che la va ben
E gio é continuà a magnar fegn.
9.
L sciusciur l'é vegnù più da vejin,
M'é pissà, chisc vel demò vin,
Mo no, l'era cinch persone
Con le sie bale e balone.
10.
Pian, pian l'usc é vert e son jit
A veder chi che l'é, e un l'à dit:
"Chisc mostri se i troon
Sta sera scì i copon."
11.
Ogneun aea te so man,
Un n legn, l'auter n ram,
Un n pal, l'auter n sas,
Che l'aea tout sù da bas.
12.
I era a mi creer cinch o sie,
Chi che l'era no ve l die;
Perché no posse testimoniar,
É mior tor sù a magnar.
13.
Mo a veder la bocia e i pie
Metesse pegn n bel dassie;
L'era Tonele de Grava l'ost
Jà l'aea beù e magnà rost
14.
L'auter a veder l ciaf pelà,
Cherdesse, no me aer falà,
L'era Tonele de Recin
Col venter pien de vin.
15.
L terzo l'era Michele, chel balbon,
De Recin e no de Janon
Perché l'à dat na balbonada,
Che m'é cognù dar na gran grignada.
16.
L'auter l'era de Recin Batista,
Chel che fasc chela burta vista.
Falaré fosc, mo a mi dit,
Da ge dar sul mus polit.
17.
L quinto po ben Luisi
Con chi bie eies griji,
Però no l'é sentù rejonar
L'é cognosciù tel grignar
18.
Cioch l'era ogneun ben, ben,
De chest volesse meter pen,
Perché en pe no i podea più star
E ogni moment i jìa a pisciar.
19.
Mo a che éi vegnui chisc bie
Da Vich a Pera? Spetà che ve l die.
A far veder l so bel carater
Da magnon, da begon e da bater.
20.
I é vegnui a voler se vendicar,
E armé a voler ge dar
E far ai fenc da Pera
Na strage e na vera.
21.
Mo se ades volede grignar
Meteve a sentir e scutar;
I à beù e ben magnà
E coscì certo la sarà.
22.
Piens de vin e piens de rost
I à fat l consiglio sa Grava l'ost.
O bela! da le doudesc de not
Con ogneun te man n got.
23.
A chi da Pera ge volon ensegnar
Colpes e bote ge volon dar.
No doi, no trei, no sie,
Ma da ciaf fin a pie.
24.
Da la una de not i se n part
Ogneun lo veit, ben tart
Verscio Pera i se n va da desperé
Coran sche n poie sun n paré.
25.
Canche i é rué ja Cascian
I à scomenzà a meter man
I nesc bie cinch a scutar
E daperdut a vardar.
26.
Parché paura aea ogneun
Che en pe sie amò valgugn
A i far dar outa, a sciampar
E te brae a se chegar.
27.
Enfati sentì ades n bel azident
Coche i à ciapà n bel spaent.
Scemon à cognù vegnir fora a pisciar
E chisc eroi i se à metù a sciampar.
28.
Canche i à vedù che Scemon sera
I disc, ades scì jon a Pera.
Ades zenza paura podon jir,
Che ogneun sarà a dormir.
29.
Parché ogneun aea paura
De ciaparsele per la so braura.
Chest l'era l più bel,
A ogneun ge premea so pel.
30.
Canche i e rué al pont de Poza,
L'à dat jù de n screpin na chegoza.
Diaol, l disc Recin, l'é n sas,
Me n sciampe, dajeme dal nas.
31.
L'é na chegoza o na fava
L disc Tonele de Grava.
No assà paura neto nia,
Che ogneun dorm da chiò fin ta Penìa.
32.
Su la speranza che ogneun sie a dormir,
Con coragio i à continuà a jir
I nesc eroi con Recin
Fin che i é rué via Salin.
33.
Aló ogneun se à fermà
Ogneun dassen l'à scutà
Che n pe no sie nesciugn gost,
Ne chélera, ne famei ne ost.
34.
Mo al musciat i no à pensà,
Che chest dut l'osservarà,
Che che i à fat e che che i à dit,
E che vegnarà dut scrit.
35.
Ló entorn n pìcol giro i à fat,
No da savech, mo da mat,
Con na tal paura semper,
Che i à ciapà tel venter.
36.
Nesciugn no l'era più sveglià
Chest ogneun me l cherdarà,
… con coragio e i corea,
… che ogneun podea.
37.
E coscì zenza nesciuna paura
I à fat veder la so braura.
Che a mi dit no la val nia
Parché i à batù con chi che dormìa.
38.
L musciat, che dut l'à vedù e sentì.
L disc: "Nia no mi emporta a mi!"
Mo se l Pech aessa sentù, co la pala
L ge paraa ben fora la bala.
39.
L ge aessa ben ensegnà
A vegnir da Pera ca
De not da la una
Co la bala e zenza luna.
40.
A voler vegnir a far vera
Ai fenc da duta Pera
Canche i é da n pez a dormir,
Mo de dì no i se fidaa vegnir.
41.
Mo voi cinch ben da grignar bie,
Chest scì dassen ve l die.
Vegnì de dì, se ve fidade,
A ciapar cater stafilade.
42.
I ve pararà dal vosc tampin
L mat, l rost, e l vin,
I ve n darà cater o sie
Segur da ciaf a pie.
43.
Ades cogne po ben fenir.
Parché sente jà Salin vegnir
Con n bachet te man
Per no dir n ram.
44.
Se no voi lepe e bastonade
Colpes, legnade e forade,
Cognaré bel, bel trotar
A costa de toalar.