Na viva pra mëisa da noza de Segn. Engl Comploj
I.
Seniëur Premeziant y Vo duc tlo da noza!
Scusëde! damande śën Vost' atenzion.
Metëde n mumënt da na pert Vosta boza,
Demez la furchëta, demez la sciadon.
Ve dije pa śën n valguna paroles,
Audiles y teniles mé drët bën amënt;
Fé mel o fé dann o fé rie ne Ve poles,
Ma anzi legrëza a chi ch' les ntënd!
II.
A dì l' aurità, ie na mëssa nevela
La cossa plu santa, che on sun chësc mond,
La cossa plu dënia, la cossa plu bela;
De tan na gran cossa messons tenì cont.
N dij che n dëss adurvé n per de soles
Per jì a na mëssa nevela nvalgon,
Magari che fossa la stredes drët moles,
Ne dëssen schivé no pantan no punton.
III.
Da chësc pò uniun śën se fé na idea
Dla festa, che duc on ncuei zelebrà,
Dla ueia, dl gaudio de chëi da Ciaucea,
De chëi de Palua y dla gran parentà.
Ma l prim a s' la goder sëis Vo, Seniëur Enghel,
Po god anda Sefa, Vost' oma, uni bel;
Cun ëila y cun Vo Vosc bon pere, ber' Enghel;
Na viva a dui trëi deberieda bel snel.
IV.
La viva ie fata ai primes ch' la toca,
Śën vëni pra i autri bel plan do a do;
N' ulëssa che valguni ëssa da dì: 'La me moca,
Ie fove pu ënghe pra i autri leprò.'
Ma sci! a dui canc che sëis tlo pra sta mëisa!
Pu auter, na viv' a uniun dessegur!
L vin ne me mancia, de chëlun n ulëis' a?
De cueciun, de blanch, de linëus o de scur?
V.
Ne posse Ve mëter uniun te si posta,
Avisa sciche sëis tlo pra mëisa metui.
Ma n' é pa malizia y ne feje aposta,
Sun chël purdenëde! Śën sons ntendui.
I fredesc, me per, che dëss' vester i primes,
Do i fredesc metonse po riesc la surans;
Vo, Mëin', ëis i libri, Vo, Sepl, la limes,
Maria y Mariana ie brovai fenans.
VI.
Śën rati che toca i noni y la nones;
Che Vo, Seniëur Enghel, che chisc tira dant?
L bën ch' i V' à fat n' ie mé rainesc y crones,
Ma l bon ch' i V' à ulù y Ve uel da mo inant.
Na viva ai prevesc, chisc ie nostra seves,
Pra d' ëi dëssa uni crestian se tenì;
Ëi lëura y se prova y zerca sciche l' eves
Tla vinia d' Idie tan de nuet che de dì.
VII.
Na viva al preve, ch' à fà la perdica,
Na viva pessunder i tochel, me per:
Na bela perdica ie chëla che scica
Tel festes, che vën zelebredes dinrer.
Tlo muessi junté mo na pitla parola:
Perdiches pudonse audì minechie
Y duc à l dover po de jì a sta scola:
Perdiches y dutrines: parola de Die.
VIII.
Śën feji na viva a ch'la pitla inuzënta:
Tu ies la nevicia dl majer Seniëur!
O sibes daniëura tan bela valënta,
Tu es sun chësc mond dessegur dut l miëur.
Ma feje pa bën nce a chi pitli na viva;
Ie spere ch' i sibe mo duc inuzënc,
Davia che si genitori ne schiva
No l lëur no la bria, ch' i sibe valënc.
IX.
Na viva ai berbesc, na viva al' andes,
Po ala cuniedes y duc i cuniei:
Cun tan de biei guanc y tel bela gherlandes
Mustrëis la legrëza de vester nviei.
Ma Vo, bera Sepl y anda Giudita,
Y Vo, anda Beta, y Vo, bera Moz,
Se foss' da Nadel, Ve menëssi n slita :
Ihi al ciaval y po vel' pitl smoz.
X.
A Vo, bera Tone, y Vo, anda Stina,
A bera Batista y si Tresel leprò,
Ve feji na viva, che degun ne ndevina,
Tan bona y tan dëucia ch' la ie pa permò.
Gutweniger Alois, Gutweinger Corl!
Na viva a Vo y a Vosta fenans!
Sce un vën da Vo, depò sautel y corel,
Davia che l spera de pië bona mans.
XI.
Śën anda Rusalia y anda Mariana,
M' é n pue' ntardivà, ne se n avëde mpermel.
Cialove, sce vëighe Merzede y Damiana
Y Cosl y anda Maria da Rainel.
Per Vo ei na viva aposta njinieda
Y śën Ve la feji da vedl amich;
Che nosta amizizia nen ie ngatieda,
Udons pu daniëura mé bele tel plich.
XII.
A Vo, bera Sepl y anda Maria,
A Vo, bera Franzl y fëna da Fëur,
Na viva a duc chëi che ie ntëur via,
Na viva cun vin da na drë' bona sëur.
Na viva ai ujins, ai studënc y cumpanies
Y po ala Seniëura Prinoth de Maran,
Po mo ai Ladurner; śën fina la tanies,
Ma mpo n' ei finà; me audieis mo ciantan.
XIII.
Ve feje na viva a duc mo te n iede
Y mo na plu granda per duc i parënc!
Ulësse che duc fossa tlo deberiede
Cun Vo pra sta mëisa biac y cuntënc.
A ulëi cunscidré iel na gran parentela,
Che porta i cuinuemes Demetz y Comploj,
Davia ch' la ie no mé granda, ma bela,
I feji na viva mo śën a dui doi.
XIV.
A duc ch' à purvà de judé ntëur ite,
Acioche chësc di vënie ora tan bel,
Dui canc sibe pu mé tla vives stluc ite!
Rengrazie a duc po de cuer mo bel snel.
Ulon mo prië, che sta festa ved' ora
Sche la ie jita ite ncuei da duman.
Die feje unì alegrëzes dainora!
Y śën Ve saludi y Ve toche la man.