Na viva pra mëisa da noza dla mëssa nevela de Seniëur P. Capuziner
Na viva pra mëisa da noza dla mëssa nevela de Seniëur P. Capuziner Piere Damian Verginer da Bula.
I.
Na ciantia metëssi gën ora
A unëur dl Seniëur Premeziant;
Ne sé po, sce vënie dainora,
Śën feji na prova d’ intant.
II.
Per vo, Seniëur Pater Verginer,
Per vo vel sta pue’ de cianzon,
Śën che sëis deventà capuziner,
Vo, nosc pitl mut da Ancion.
III.
Ve dije medrë doi paroles,
Ma drët ala bona y bel bret;
Savëis pu ch’ é fà pitla scoles,
Y chëles mo massa da fret.
IV.
Audide śën cie che ve dije,
Y cie che é ncuei usservà;
Medrë che vosc cuer se la rije,
Po sons nce ie cuntentà.
V.
Ciauzei n’ ëis'a drë’ ala moda,
Po jëis mo deschëuz ncantëur;
Che sce ruvessais te vel’ broda?
Po fossel n feter bur lëur.
pagina:48
VI.
Dla berba ne diji mé nia,
Che berbes ai bën ce tlo ntëur;
Uniun uel valëi cula sia,
Y mascima i jëuni canche la flëur.
VII.
Y l guant, che ëis vo, Seniëur Piere,
Nen ie pa n guan’ da seniëur;
Ie cële ntëur ora y chiere,
Y vëighe, che duc n à n miëur.
VIII.
A vester ncuei na tel festa,
Pudais bën mpo n tò n miëur.
Minais’ a ch’ uniss’ la tampesta?
Pu po fais pu sot al celëur.
IX.
Y tlo sëis pu ënghe a sosta,
Y duc à pu l guan’ da san dì;
Vosc bel sei bën ie cie che l costa:
Na preja sc’ che chël da uni di.
X.
Dl guant ne ndajëise vo nia,
Mé n bel paternoster y l brevier;
L rest dajessaise dut via,
Magari per n criegl de pier.
XI.
Doi cosses ie vosta legrëza:
N gran paternoster y l brevier;
Y chësta ie vosta richëza:
Ma mpo sëis plu rich che n banchier.
XII.
Vo sëis śën segur dla salvëza,
Y sëis veramënter cuntënt;
Gudëis uni vera belëza
A vester te n tel bel cunvënt.
XIII.
O bon Padre Piere, priede
Per duc vosc amics y parënc,
Ch’ i ruve n di deberieda
A vester beac y cuntënc.
XIV.
Y vo, che sëis tlo a sta noza,
Gudëvela uniun da crestian!
Drusëde śën duc vosta boza:
Na viva a Seniëur Piere Damian!